തിങ്ങിനിറഞ്ഞ 55,000ലധികം കാണികളെ സാക്ഷിയാക്കി മഴ പെയ്തപ്പോള്‍ ആശങ്കയിലായത് ബിസിസിഐയാണ്. മത്സരം നടക്കാതെ വന്നാല്‍ 60 കോടിയിലധികം രൂപ ടിക്കറ്റ് ഇനത്തില്‍ തിരിച്ച് നല്‍കണം. ഇത് ബിസിസിഐയെ സാരമായി ബാധിക്കും. അതിനാലാണ് പേരിനെങ്കിലും കളി നടത്താന്‍ ബിസിസിഐ സമ്മര്‍ദം ചെലുത്തിയത്. അങ്ങനെയാണ് 8 ഓവര്‍ മത്സരം നടന്നത്.

കളി കാണാതെ പോകില്ല എന്ന ആവേശത്തിലായിരുന്നു മലയാളികള്‍. പണം അവര്‍ക്ക് പ്രശ്‌നമല്ല. കളിയാണ് പ്രശ്‌നം അത് നടക്കണം. 9 മണി കഴിഞ്ഞിട്ടും മഴ പെയ്തുകൊണ്ടിരുന്നിട്ടും ഒരാളും എഴുന്നേറ്റ് പോയില്ല. മലയാളികളുടെ ഈ ആത്മാര്‍ത്ഥതയെ ബിസിസിഐ തുരങ്കം വച്ച് നനഞ്ഞ് കുതിര്‍ന്ന പിച്ചില്‍ അവര്‍ ടീമിനെ ഇറക്കി.

ഒരുമണിക്കൂറോളം മാറി നിന്ന മഴ പിന്നെ ചാറ്റലിന്റെ രൂപത്തില്‍ പാറി വന്നു. ആരാധകരുടെ മാത്രമല്ല കെസിഎയുടെയും മുഖം വാടി.ഇടയ്ക്ക് കനത്ത മഴ 4.30 ആയിട്ടും തോരാതെ വന്നതോടെ മല്‍സരം പൂര്‍ണമായി നടത്താനാകുമോയെന്ന ആശങ്ക ഉയര്‍ന്നു. ഓവറുകള്‍ വെട്ടിച്ചുരുക്കേണ്ടി വന്നേക്കാമെന്ന് സ്‌റ്റേഡിയത്തിലേക്ക് കയറുവന്നതിനിടെ ജനം അടക്കം പറഞ്ഞു.

അഞ്ചുമണിക്ക് മഴ അല്‍പം കുറഞ്ഞതോടെ അധികൃതരുടെ മുഖത്ത് പുഞ്ചിരി വിടര്‍ന്നു. പിച്ചുണക്കാനുള്ള ഡ്രേയിനേജ് സംവിധാനം തകൃതിയായി പ്രവര്‍ത്തിപ്പിച്ചു.ഈ സമയം സ്‌റ്റേഡിയം പകുതിയോളം കാണികള്‍ നിറഞ്ഞു.അഞ്ചരയായപ്പോഴും ചാറ്റല്‍ മഴ കളി തുടര്‍ന്നു.പിച്ചുണക്കാനുള്ള തീവ്രശ്രമം തുടര്‍ന്നു. ആരാധകരുടെ ആവേശം തെല്ലും തണുത്തില്ല. മഴയില്‍ കുതിര്‍ന്ന് സൊറ പറഞ്ഞ് അവര്‍ സ്‌റ്റേഡിയത്തിലേക്ക് കയറി.

6.15 ഓടെ വീണ്ടും മഴ വില്ലനായി വന്നു. മൈതാനം വീണ്ടും മൂടി.ടോസ് വൈകുമെന്ന കാര്യം എല്ലാവരും ഉറപ്പിച്ചു. ഏഴ് മണിയോടെ മഴയ്ക്ക് നേരിയ ശമനമുണ്ടായി. ഇതോടെ ഇരുടീമുകളുടെയും കളിക്കാര്‍ പരിശീലനത്തിനായി മൈതാനത്തിറങ്ങി.എന്നാല്‍ ചാറ്റല്‍ മഴ തുടര്‍ന്നതോടെ മല്‍സരം കൂടുതല്‍ വൈകുമെന്ന് ഉറപ്പായി. രാത്രി 8.30 ഓടെയാണ് മഴ ശമിച്ചത്. തുടര്‍ന്ന് അമ്പയര്‍മാര്‍ പിച്ച് പരിശോധിച്ച് പച്ചക്കൊടി കാട്ടി. 9.30 നാണ് കളി ആരംഭിക്കുന്നത്.

അതേസമയം, ന്യൂസിലന്‍ഡിനെതിരായി നടന്ന മൂന്നു മത്സരങ്ങളുള്ള ഏകദിന പരമ്പരയിലെ അതേ സാഹചര്യമാണ് ട്വന്റി 20 പരമ്പരയിലും ഉണ്ടായിരിക്കുന്നത്. ആദ്യ രണ്ടു കളികള്‍ ഇരുടീമുകളും പങ്കുവെച്ചപ്പോള്‍ ഏകദിന പരമ്പര ജേതാക്കളെ നിര്‍ണയിച്ചത് കാണ്‍പുരിലെ മൂന്നാം മത്സരമായിരുന്നു. ആറു റണ്‍സ് വിജയവുമായാണ് ആതിഥേയര്‍ പരമ്പര സ്വന്തമാക്കിയത്.