കേരളത്തിലെ ക്രിക്കറ്റ് ആരാധകര്‍ക്ക് സന്തോഷിക്കാന്‍ ഒരു വാര്‍ത്ത. ഇന്ത്യ-ന്യൂസീലന്‍ഡ് ടിട്വന്റി മത്സരത്തിന് വേദിയായതിന് പിന്നാലെ തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തില്‍ ഐ.പി.എല്‍ നടത്താന്‍ ആലോചിക്കുന്നു.

ഇതുമായി ബന്ധപ്പെട്ട് കേരള ക്രിക്കറ്റ് അസോസിയേഷന്‍ ബി.സി.സി.ഐക്ക് അപേക്ഷ നല്‍കും. ഗ്രീന്‍ഫീല്‍ഡ് സ്റ്റേഡിയം ഐ.പി.എല്ലിന് തയ്യാറാണെന്നും ബി.സി.സി.എെയും ഫ്രാഞ്ചൈസികളുമാണ് ഇക്കാര്യത്തില്‍ തീരുമാനമെടുക്കേണ്ടതെന്നും കേരള ക്രിക്കറ്റ് അസോസിയേഷന്‍ വ്യക്തമാക്കി.
ബിസിസിഐ ആക്റ്റിങ് സെക്രട്ടറി അമിതാഭ് ചൗധരി ഇന്ത്യയുടെ മത്സരം കാണാന്‍ സ്റ്റേഡിയത്തിലുണ്ടായിരുന്നു. ഇതുസംബന്ധിച്ച്‌ ചര്‍ച്ച ചെയ്തശേഷം തീരുമാനമെടുക്കുമെന്നാണ് അദ്ദേഹം അറിയിച്ചിരിക്കുന്നതെന്നും കേരള ക്രിക്കറ്റ് അസോസിയേഷന്‍ വ്യക്തമാക്കി.
29 വര്‍ഷത്തിന് ശേഷം വിരുന്നെത്തിയ അന്താരാഷ്ട്ര മത്സരത്തിന് വന്‍ ജനപങ്കാളിത്തമാണുണ്ടായത്. കനത്ത മഴയുണ്ടായിട്ടും നിരവധി പേരാണ് കളി കാണാന്‍ കാത്തിരുന്നത്. ഒപ്പം ഗ്രൗണ്ട് വേഗത്തില്‍ ഉണക്കാന്‍ കഴിഞ്ഞതും കേരളത്തിന് നേട്ടമായി. ഇന്ത്യന്‍ ക്യാപ്റ്റന്‍ വിരാട് കോലിയും കിവീസ് ക്യാപ്റ്റന്‍ കെയ്ന്‍ വില്ല്യംസണും ഗ്രീന്‍ഫീല്‍ഡ് സ്റ്റേഡിയത്തെ പ്രശംസിച്ചിരുന്നു. ഇത്രയും മികച്ച സ്റ്റേഡിയമുണ്ടായിട്ടും കേരളത്തില്‍ അന്താരാഷട്ര മത്സരങ്ങളുടെ എണ്ണം കുറയുന്നത് എന്താണെന്നായിരുന്നു കോലി ചോദിച്ചത്.