രഞ്ജിയിൽ സെമി ഫൈനല്‍ പ്രതീക്ഷയുമായി ഇറങ്ങിയ കേരളം വിദര്‍ഭയെ 246 റൺസിന്‌ പുറത്താക്കി. കേരളത്തിന്റെ ബൗളര്‍മാര്‍ക്ക് മുന്നില്‍ വിദര്‍ഭയുടെ ബാറ്റ്‌സ്മാന്മാർക്ക് പിടിച്ചു നിൽക്കാനായില്ല. അഞ്ചു വിക്കറ്റുമായി തിളങ്ങിയ സ്പിന്നര്‍ അക്ഷയ് കെ എസ് ആണ് വിദര്‍ഭയെ തകർത്തത്.

കളിയുടെ ആദ്യ ദിനം മുതലേ കേരള ബൗളർമാർക്കായിരുന്നു ആധിപത്യം. 24 ഓവര്‍ എറിഞ്ഞ അക്ഷയ് 52 റണ്‍സ് മാത്രം വഴങ്ങിയാണ് അഞ്ചു വിക്കറ്റെടുത്തത്. ഒരു ഘട്ടത്തിൽ 9 വിക്കറ്റ് നഷ്ടത്തിൽ 193 എന്ന നിലയിലായിരുന്ന വിദര്‍ഭയെ പത്താം വിക്കറ്റില്‍ വഖാരെയും (27 നോട്ടൗട്ട്) ലളിത് യാദവും (24) ചേര്‍ന്ന് നേടിയ 53 റൺസാണ് 246ല്‍ എത്തിച്ചത്. മറുപടി ബാറ്റിംഗ് ആരംഭിച്ച കേരളത്തിന് 32 റൺസ് എടുക്കുന്നതിനിടെ 2 വിക്കറ്റ് നഷ്ടമായി.