ഏകദിനത്തിൽ മൂന്നാം ഡബിൾ സെഞ്ചുറി എന്ന ചരിത്ര നേട്ടവുമായി രോഹിത് ശർമ്മ. ഏകദിന ചരിത്രത്തിൽ മൂന്ന് ഇരട്ട സെഞ്ചുറി നേടുന്ന ആദ്യ താരമാണ് രോഹിത്. 153 പന്തിൽ 208 റൺസോടെ രോഹിത് പുറത്താകാതെ നിന്നു. 13 ഫോറും 12 സിക്സും അടങ്ങിയതായിരുന്നു രോഹിത്തിന്റെ ഇന്നിംഗ്സ്.

115 പന്തിൽ സെഞ്ചുറി നേടിയ രോഹിത് പിന്നീട് കൂടുതൽ അക്രമകാരിയായി. പിന്നീട്‌ നേരിട്ട 38 പന്തിൽ 108 റൺസാണ് അടിച്ചുകൂട്ടിയത്. ലങ്കയ്ക്കെതിരേ രോഹിതിന്‍റെ രണ്ടാം ഇരട്ട സെഞ്ചുറിയാണിത്. 2014 ൽ കൊൽക്കത്തയിൽ ലങ്കയ്ക്കെതിരേ രോഹിത് നേടിയ 264 റൺസാണ് ഏകദിന ക്രിക്കറ്റിലെ ഏറ്റവും ഉയർന്ന വ്യക്തിഗത സ്കോർ. 2013-ൽ ബംഗളൂരുവിൽ ഓസ്ട്രേലിയയ്ക്കെതിരെയും രോഹിത് ഡബിൾ സെഞ്ചുറി നേടിയിരുന്നു.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ നിശ്ചിത 50 ഓവറിൽ നാലു വിക്കറ്റ് നാലു വിക്കറ്റ് നഷ്ടത്തിൽ 392 റൺസ് നേടി. രോഹിതിന് പുറമെ ഓപ്പണർ ശിഖർ ധവാൻ (68), ശ്രേയസ് അയ്യർ (88) എന്നിവരും മികച്ച ബാറ്റിംഗ് കാഴ്ച്ചവെച്ചു. എന്നാൽ മഹേന്ദ്രസിങ് ധോണി (അഞ്ചു പന്തിൽ ഏഴ്), ഹാർദിക് പാണ്ഡ്യ (അഞ്ചു പന്തിൽ എട്ട്) എന്നിവർ നിരാശപ്പെടുത്തി. സച്ചിൻ തെൻഡുൽക്കർ, വീരേന്ദർ സേവാഗ് എന്നിവരാണ് ഏകദിന ക്രിക്കറ്റിൽ ഡബിൾ സെഞ്ചുറി നേടിയിട്ടുള്ള മറ്റ് ഇന്ത്യൻ താരങ്ങൾ