ഇന്ത്യ- ശ്രീലങ്ക ഏകദിനപരമ്പരയിലെ മൂന്നാം ഏകദിനത്തിൽ ഇന്ത്യക്ക് എട്ടു വിക്കറ്റ് ജയം. ജയത്തോടെ ഇന്ത്യ പരമ്പര സ്വന്തമാക്കി. 216 റൺസ് വിജയലക്ഷ്യവുമായി ഇറങ്ങിയ ഇന്ത്യ ഓപ്പണർ ശിഖർ ധവാന്റെ മിന്നുന്ന സെഞ്ച്വറിയുടെ ബലത്തിൽ അനായാസ ജയം സ്വന്തമാക്കി. 83 പന്തിൽ നിന്നായിരുന്നു ധവാന്റെ സെഞ്ച്വറി. ജയത്തോടെ തുടർച്ചയായി എട്ട് പരമ്പര വിജയം സ്വന്തമാക്കുന്ന രണ്ടാമത്തെ ടീമായി ഇന്ത്യ.

ടോസ് നഷ്ടപ്പെട്ട് ബാറ്റിങ് ആരംഭിച്ച ശ്രീലങ്ക 215 റൺസിന്‌ എല്ലാവരും പുറത്തായി. 95 റൺസ് എടുത്ത ലങ്കൻ ഓപ്പണർ ഉപുൽ തരംഗയാണ് ടോപ് സ്‌കോറർ. ഒരു ഘട്ടത്തിൽ രണ്ടു വിക്കറ്റ് നഷ്ടത്തിൽ 136 റൺസ് എന്ന ശക്തമായ നിലയിൽ നിന്നും ചീട്ടുകൊട്ടാരംപോലെ തകരുകയായിരുന്നു ലങ്കൻ ബാറ്റിംഗ് നിര. മൂന്നു വിക്കറ്റുകൾ വീതം നേടിയ കുൽദീപ് യാദവും യുസ്‌വേന്ദ്ര ചാഹലുമാണ് ലങ്കൻ ബാറ്റിങ് നിരയുടെ നടുവൊടിച്ചത്.