ഓൾ റൗണ്ടർ ആഞ്ചലോ മാത്യൂസിനെ ശ്രീലങ്കയുടെ ഏകദിന,ട്വന്റി 20 ക്യാപ്റ്റനായി നിയമിച്ചു. കഴിഞ്ഞ വര്‍ഷം ജൂലൈയിൽ മാത്യൂസ് നായക സ്ഥാനം ഒഴിഞ്ഞിരുന്നു. പിന്നീട് ഉപുൽ തരംഗയും തിസാര പെരേരയും നായകന്മാരായി എത്തിയെങ്കിലും ടീമിന്റെ പ്രകടനത്തിൽ മാറ്റമുണ്ടായില്ല. ഇതേത്തുടർന്നാണ് മാത്യൂസിനെ ക്യാപ്റ്റനായി തിരികെ കൊണ്ടുവരുന്നത്.

കഴിഞ്ഞ ജൂലൈയിൽ സിംബാബ്‌വെക്കെതിരെയുള്ള മോശം പ്രകടനത്തെ തുടർന്നാണ് മാത്യൂസിനെ നായക സ്ഥാനത്ത് നിന്ന് മാറ്റിയത്. ബംഗ്ലാദേശ്, സിംബാബ്‌വെ ടീമുകൾ ഉൾപ്പെടുന്ന ത്രിരാഷ്ട്ര പരമ്പരയിലാണ് മാത്യൂസ് ശ്രീലങ്കയെ നയിക്കുക. ജനുവരി 15 മുതലാണ് പരമ്പര ആരംഭിക്കുന്നത്.എന്നാൽ ശ്രീലങ്കൻ ടെസ്റ്റ് ടീമിനെ ദിനേശ് ചന്ദിമല്‍ തന്നെ നയിക്കുമെന്ന് ശ്രീലങ്കൻ ക്രിക്കറ്റ് ബോർഡ് അറിയിച്ചു.

.