ന്യൂസിലന്‍ഡിനെതിരായ ഏകദിന മത്സരത്തിൽ പാക്കിസ്ഥാന് നാണംകെട്ട തോൽവി. 183 റണ്‍സിനാണ് പാക്കിസ്ഥാൻ തോറ്റത്. ആദ്യം ബാറ്റ് ചെയ്ത ന്യൂസീലൻഡ് 257 റൺസ് നേടി. 73 റണ്‍സെടുത്ത കെയ്ന്‍ വില്യംസണും 52 റണ്‍സെടുത്ത റോസ് ടെയ്‌ലറുമാണ് ന്യൂസീലൻഡ് നിരയിൽ തിളങ്ങിയത്. മറുപടി ബാറ്റിങ്ങിനിറങ്ങിയ പാക്കിസ്ഥാൻ 74 റണ്‍സിന് ഓള്‍ഔട്ട് ആയി.

കിവീസ് പേസ് ബൗളര്‍ ട്രെന്റ് ബോള്‍ട്ടിന്റെ മാരക ബൗളിംഗാണ് പാക്കിസ്ഥാനെ തകർത്തത്. 7.2 ഓവര്‍ പന്തെറിഞ്ഞ ബോള്‍ട്ട് വെറും 17 റണ്‍സ് മാത്രം വഴങ്ങി അഞ്ച് വിക്കറ്റുകളാണ് സ്വന്തമാക്കിയത്. ഒരു ഘട്ടത്തിൽ ഏകദിനത്തിലെ ഏറ്റവും കുറഞ്ഞ സ്കോറിന് പുറത്താക്കുമെന്ന് തോന്നിച്ചെങ്കിലും വാലറ്റം പിടിച്ച് നിന്നതോടെ പാക്കിസ്ഥാൻ നാണക്കേടിൽ നിന്നും രക്ഷപെടുകയായിരുന്നു.

32/8 എന്ന നിലയിൽ കൂപ്പുകുത്തിയ പാക്കിസ്ഥാനെ മുഹമ്മദ് അമീര്‍ (14), പതിനൊന്നാമനായി ഇറങ്ങിയ റുമ്മാന്‍ റയീസ്(16) എന്നിവർ ചേർന്നാണ്‌ സ്കോർ 74ൽ എത്തിച്ചത്. പതിനൊന്നാമനായി ഇറങ്ങി 16 റൺസ് നേടിയ റുമ്മാന്‍ റയീസാണ് ടോപ് സ്കോറർ. ഈ മത്സരത്തിലും തോറ്റതോടെ അഞ്ച് മത്സരങ്ങളടങ്ങിയ പരമ്പര ന്യൂസിലന്‍ഡ് 3-0ത്തിന് സ്വന്തമാക്കുകയും ചെയ്തു.