ഓസ്ട്രേലിയക്കെതിരായ ആദ്യ ഏകദിനത്തില്‍ ഇംഗ്ലണ്ടിന് മികച്ച വിജയം. അഞ്ച് വിക്കറ്റിനാണ് ഇംഗ്ലണ്ട് ജയിച്ചത്. ജേസണ്‍ റോയിയുടെ തകർപ്പൻ ബാറ്റിങ്ങാണ് ഇംഗ്ലണ്ടിന് വിജയമൊരുക്കിയത്. ആദ്യം ബാറ്റ് ചെയ്ത ഓസ്ട്രേലിയ 50 ഓവറില്‍ 8 വിക്കറ്റ് നഷ്ടത്തിൽ 304 റണ്‍സ് നേടി. ആരോൺ ഫിഞ്ചിന്റെ സെഞ്ചുറിയാണ് ഓസ്‌ട്രേലിയയെ 300 കടത്തിയത്. ഓസ്‌ട്രേലിയ്ക്കായി സ്റ്റോയിനിസും മിച്ചല്‍ മാര്‍ഷും അർദ്ധ സെഞ്ച്വറി നേടി.

മറുപടി ബാറ്റിങ്ങിനിറങ്ങിയ ഇംഗ്ലണ്ടിന് തുടക്കത്തിലെ വിക്കറ്റ് നഷ്ടമായെങ്കിലും ജേസണ്‍ റോയിക്ക് കൂട്ടായി ജോ റൂട്ട് എത്തിയതോടെ ഇംഗ്ലണ്ട് തിരിച്ചുവന്നു. മൂന്നാം വിക്കറ്റില്‍ ഇരുവരും 221 റണ്‍സാണ് നേടിയത്. 151 പന്തില്‍ 16 ബൗണ്ടറിയും 5 സിക്സും അടക്കം 180 റണ്‍സ് നേടിയാണ് റോയി മടങ്ങിയത്. ഒരു ഇംഗ്ലണ്ട് താരം ഏകദിനത്തില്‍ നേടുന്ന ഏറ്റവും ഉയര്‍ന്ന സ്കോറാണിത്. മികച്ച രീതിയില്‍ ബാറ്റ് വീശിയ ജോ റൂട്ട് കൂടുതൽ നഷ്ട്ടങ്ങളില്ലാതെ ഇംഗ്ലണ്ടിനെ വിജയ തീരത്തെത്തിച്ചു. 91 റണ്‍സുമായി റൂട്ട് പുറത്താകാതെ നിന്നു.