ന്യൂസിലന്ഡിനെതിരായ ഏകദിന പരമ്പരയില് പാക്കിസ്ഥാന് തോല്വി
ന്യൂസിലന്ഡിനെതിരായ ഏകദിന പരമ്പരയില് പാക്കിസ്ഥാന് തോല്വി. അഞ്ചാമത്തെയും അവസാനത്തെയും മത്സരത്തില് 15 റണ്സിന്റെ വിജയം നേടിയാണ് കിവീസ് പരന്പര പൂര്ത്തിയാക്കിയത്. ആദ്യം ബാറ്റ് ചെയ്ത ന്യൂസിലന്ഡ് 50 ഓവറില് ഏഴ് വിക്കറ്റിന് 271 റണ്സ് നേടി. ഒരു ഓവര് ബാക്കി നില്ക്കേ പാക്കിസ്ഥാന്റെ പോരാട്ടം 256 റണ്സില് അവസാനിച്ചു.
ടോസ് നേടി ബാറ്റിംഗിനിറങ്ങിയ കിവീസിന് ഓപ്പണര് മാര്ട്ടിന് ഗുപ്റ്റിലിന്റെ സെഞ്ചുറിയാണ് മികച്ച സ്കോര് സമ്മാനിച്ചത്. ഗുപ്റ്റില് 126 പന്തുകള് നേരിട്ട് 100 റണ്സ് നേടി. റോസ് ടെയ്ലര് 59 റണ്സ് നേടി ഗുപ്റ്റിലിന് പിന്തുണ നല്കി. പാക്കിസ്ഥാന് വേണ്ടി റുമാന് റായീസ് മൂന്ന് വിക്കറ്റ് വീഴ്ത്തി.
വിജയലക്ഷ്യം പിന്തുടര്ന്ന പാക്കിസ്ഥാന്റെ മുന്നിര പതിവ് പോലെ തകര്ന്നു. സ്കോര് 19ല് എത്തിയപ്പോഴെ ഓപ്പണര്മാര് പവലിയനില് തിരിച്ചെത്തി. ബാബര് അസം (10), മുഹമ്മദ് ഹഫീസ് (6), സര്ഫ്രാസ് അഹമ്മദ് (3) എന്നിവര് കൂടി മടങ്ങിയതോടെ സ്കോര് 57/5 എന്ന നിലയിലായി.
ആറാം വിക്കറ്റില് ഒത്തുചേര്ന്ന ഹാരിസ് സൊഹൈല് (63), ഷഹദാബ് ഖാന് (54) എന്നിവരുടെ അര്ധ സെഞ്ചുറികളാണ് പാക്കിസ്ഥാനെ മത്സരത്തിലേക്ക് തിരിച്ചുകൊണ്ടുവന്നത്. ഇരുവരും ചേര്ന്ന് 105 റണ്സ് സ്കോര് ചെയ്തു. വാലറ്റത്ത് ആമിര് യാമിന് (പുറത്താകാതെ 32), മുഹമ്മദ് നവാസ് (23), ഫഹീം അഷ്റഫ് (23) എന്നിവര് പൊരുതിയെങ്കിലും പാക്കിസ്ഥാന് ജയം അകന്നുനിന്നു. കിവീസിന് വേണ്ടി മാറ്റ് ഹെന്ട്രി നാല് വിക്കറ്റ് വീഴ്ത്തി.
https://www.facebook.com/Malayalivartha