ശ്രീലങ്കയ്ക്ക് നാണംകെട്ട തോൽവി; ബംഗ്ലാദേശിനോട് തോറ്റത് 163 റൺസിന്
ത്രിരാഷ്ട്ര പരമ്പരയിൽ ശ്രീലങ്കയ്ക്ക് വീണ്ടും തോൽവി. കഴിഞ്ഞ ദിവസം സിംബാബ്വെയോട് തോറ്റതിന് പിന്നാലെ ബംഗ്ലാദേശിനോടും തോൽവി വഴങ്ങിയിരിക്കുകയാണ് ശ്രീലങ്ക. ബംഗ്ലാദേശിനോട് 163 റൺസിന്റെ നാണം കെട്ട തോൽവിയാണ് ശ്രീലങ്ക ഏറ്റുവാങ്ങിയത്. ആദ്യം ബാറ്റ് ചെയ്ത ബംഗ്ലാദേശ് 50 ഓവറില് 7 വിക്കറ്റ് നഷ്ടത്തില് 320 റണ്സ് നേടിയപ്പോള് ലങ്ക 32.2 ഓവറില് 157 റൺസിന് എല്ലാവരും പുറത്തായി.
ബംഗ്ലാദേശിന് വേണ്ടി തമീം ഇക്ബാൽ 84 റണ്സ് നേടി ടോപ് സ്കോററായി. ഷാകിബ്(67) മുഷ്ഫികുര് റഹീം (62) എന്നിവരും അർധസെഞ്ചുറി നേടി. അവസാന ഓവറുകളിൽ തകർത്തടിച്ച സബ്ബീര് റഹ്മാന്(12 പന്തില് പുറത്താകാതെ 24) ബംഗ്ലാദേശിനെ 300 കടത്തി. ശ്രീലങ്കയ്ക്കായി തിസാര പെരേര മൂന്ന് വിക്കറ്റ് നേടി.
മറുപടി ബാറ്റിങ്ങിനിറങ്ങിയ ശ്രീലങ്കയുടെ മുൻ നിര താരങ്ങളെല്ലാം നിരാശപ്പെടുത്തി. 29 റണ്സ് നേടിയ തിസാര പെരേരയാണ് ശ്രീലങ്കന് നിരയിലെ ടോപ് സ്കോറര്. ബംഗ്ലാദേശിന് വേണ്ടി ഷാകിബ് അല് ഹസന് മൂന്നും മുസ്തഫിസുര്,മൊര്തസ, റൂബല് ഹൊസൈന് എന്നിവർ രണ്ട് വിക്കറ്റും വീഴ്ത്തി.
https://www.facebook.com/Malayalivartha