ദക്ഷിണാഫ്രിക്കക്കെതിരായ മൂന്നാം ടെസ്റ്റിലും തകർന്നടിഞ്ഞ് ഇന്ത്യൻ ബാറ്റിംഗ് നിര. ആദ്യ രണ്ട് ടെസ്റ്റിലും ദയനീയമായി പരാജയപ്പെട്ട ഇന്ത്യക്ക് അഭിമാന പോരാട്ടമായിരുന്നു അവസാന ടെസ്റ്റ്. എന്നാൽ പതിവ് പോലെ പേരുകേട്ട ഇന്ത്യൻ ബാറ്റിംഗ് നിര ആഫ്രിക്കൻ പേസ് ആക്രമണത്തിന് മുന്നിൽ തകരുകയായിരുന്നു.

അർദ്ധ സെഞ്ച്വറി നേടിയ ക്യാപ്റ്റൻ വിരാട് കൊഹ്‌ലിയും ചേതേശ്വർ പൂജാരയുമാണ് ഇന്ത്യൻ നിരയിൽ അല്പമെങ്കിലും പിടിച്ചു നിന്നത്. ടീമിൽ തിരിച്ചെത്തിയ അജിങ്ക്യ രഹാനെ 9 റണ്ണുമായി മടങ്ങി. ആദ്യ രണ്ടു ടെസ്റ്റിലും രഹാനയെ ഉൾപ്പെടുത്താത്തതിൽ വലിയ വിമർശനം ഉയർന്നിരുന്നു. ഓപ്പണർ കെ എൽ രാഹുൽ റൺ എടുക്കാതെ മടങ്ങി.

രണ്ടു മാറ്റങ്ങളുമായാണ് ഇന്ത്യ ഇറങ്ങിയത്. രഹാനെയും ഭുവനേശ്വറും ടീമിൽ തിരിച്ചെത്തിയപ്പോൾ രോഹിത്തും അശ്വിനും ടീമിൽ നിന്ന് പുറത്തായി. ദക്ഷിണാഫ്രിക്കക്ക് വേണ്ടി മോർക്കലും ഫിലാണ്ടറും രണ്ട് വിക്കറ്റ് നേടി. ഒടുവിൽ വിവരം കിട്ടുമ്പോൾ ഇന്ത്യ 8 വിക്കറ്റ് നഷ്ടത്തിൽ 164 റൺസ് എന്ന നിലയിലാണ്. 12 റണ്ണുമായി ഭുവനേശ്വറും റൺ ഒന്നുമെടുക്കാതെ ഇഷാന്ത് ശർമ്മയുമാണ് ക്രീസിൽ.