ഇന്ത്യ ദക്ഷിണാഫ്രിക്ക മൂന്നാം ടെസ്റ്റിൽ ദക്ഷിണാഫ്രിക്ക 194 റണ്‍സിന് പുറത്ത്. ഇന്ത്യയുടെ ആദ്യ ഇന്നിംഗ്സ് സ്കോർ മറികടന്ന ദക്ഷിണാഫ്രിക്കയ്ക്ക് ഏഴ് റണ്‍സിന്റെ ഒന്നാം ഇന്നിംഗ്സ് ലീഡ്. അഞ്ച് വിക്കറ്റ് നേടിയ ജസ്പ്രീത് ബുംറയാണ് ദക്ഷിണാഫ്രിക്കയെ വേഗത്തിൽ പുറത്താക്കാൻ സഹായിച്ചത്.

ഒരു ഘട്ടത്തിൽ ഇന്ത്യ ലീഡ് നേടുമെന്ന് തോന്നിച്ചെങ്കിലും അര്‍ദ്ധ സെഞ്ച്വറി നേടിയ ഹാഷിം അംലയാണ് ദക്ഷിണാഫ്രിക്കയെ വന്‍ തകര്‍ച്ചയില്‍ നിന്നും കരകയറ്റിയത്. 30 റൺസ് നേടിയ ഫിലാൻഡർ അംലയ്ക്ക് മികച്ച പിന്തുണ നൽകി.അഞ്ച് വിക്കറ്റ് നേടിയ ബുംറയ്ക്ക് പുറമെ ഭുവനേശ്വര്‍ കുമാർ മൂന്നും ഇഷാന്ത് ശര്‍മ്മയും മുഹമ്മദ് ഷമിയും ഓരോ വിക്കറ്റും വീഴ്ത്തി.

രണ്ടാം ഇന്നിംഗ്സ് ബാറ്റിംഗ് ആരംഭിച്ച ഇന്ത്യയ്ക്ക് പാർഥിവ് പട്ടേലിന്റെ വിക്കറ്റ് നഷ്ടമായി. കെ എൽ രാഹുലിന് പകരം പാർഥിവ് പട്ടേലാണ് മുരളി വിജയ്ക്കൊപ്പം ഇന്നിംഗ്സ് ഓപ്പൺ ചെയ്തത്. പട്ടേൽ 16 റൺസ് നേടി മടങ്ങി. ഫിലാണ്ടറിനാണ് വിക്കറ്റ്. ഒടുവിൽ വിവരം കിട്ടുമ്പോൾ ഒരു വിക്കറ്റ് നഷ്ടത്തിൽ 32 റൺസ് എന്ന നിലയിലാണ് ഇന്ത്യ. ഇന്ത്യക്ക് ഇപ്പോൾ 25 റൺസ് ലീഡുണ്ട്.