ഇന്ത്യ ദക്ഷിണാഫ്രിക്ക ടെസ്റ്റ് പരമ്പരയിൽ ഇന്ത്യയ്ക്ക് ആശ്വാസ ജയം. ആദ്യ രണ്ട് ടെസ്റ്റും ദയനീയമായി പരാജയപ്പെട്ട ഇന്ത്യ അവസാന ടെസ്റ്റ് ജയിച്ച് മാനം കാത്തു. ഇന്ത്യ ഉയർത്തിയ 241 റൺസ് വിജയലക്ഷ്യം മറികടക്കാൻ ദക്ഷിണാഫ്രിക്കയ്ക്കായില്ല. ഒരു ഘട്ടത്തിൽ അംലയും എഡ്ഗാരും ചേർന്ന് സുരക്ഷിതമായി ദക്ഷിണാഫ്രിക്കയെ വിജയതീരത്തെത്തിക്കുമെന്ന് കരുതിയെങ്കിലും അംലയെ വീഴ്ത്തി ഇഷാന്ത് ശർമ്മ ഇന്ത്യയെ മത്സരത്തിലേക്ക് തിരികെ കൊണ്ടുവന്നു.

തുടർന്ന് മികച്ച രീതിയിൽ പന്തെറിഞ്ഞ ബുംറയും ഇഷാന്തും കൃത്യമായ ഇടവേളകളിൽ വിക്കറ്റ് വീഴ്ത്തി. ചായക്ക് ശേഷം ഷമിയുടെ തീതുപ്പുന്ന പന്തുകൾ ഇന്ത്യയെ വിജയ തീരത്തെത്തിക്കുകയായിരുന്നു. ഒരുവശത്ത് വിക്കറ്റ് വീഴുമ്പോഴും ഇന്ത്യൻ ബൗളർമാരെ ഫലപ്രദമായി നേരിട്ട് എഡ്ഗാർ പിടിച്ചു നിന്നു. എഡ്ഗാർ 86 റൺസ് നേടി പുറത്താകാതെ നിന്നു.

ഇന്ത്യക്ക് വേണ്ടി ഷമി അഞ്ച് വിക്കറ്റും ഇഷാന്ത് ശർമ്മയും ബുംറയും രണ്ട് വിക്കറ്റും വീഴ്ത്തി.