ഐപിഎല്‍ പതിനൊന്നാം സീസണിലേക്ക് ആറ്  മലയാളി താരങ്ങളും. ആദ്യ ഘട്ട ലേലം നടന്ന ഇന്നലെ മലയാളി താരം സഞ്ജു സാംസണെ 8 കോടി രൂപയ്ക്കാണ് രാജസ്ഥാൻ റോയൽസ് സ്വന്തമാക്കിയത്. ഇതിന് പിന്നാലെ ബേസിൽ തമ്പിയെ 95 ലക്ഷം രൂപയ്ക്ക് ഹൈദരാബാദ് സൺറൈസേഴ്‌സ് സ്വന്തമാക്കിയിരുന്നു. ഇപ്പോഴിതാ കൂടുതൽ മലയാളി താരങ്ങളെ ഐപിഎൽ ടീമുകൾ സ്വന്തമാക്കിയിരിക്കുകയാണ്.

ഇന്ന് നടന്ന രണ്ടാം ഘട്ട ലേലത്തിൽ കെ.എം ആസിഫ്, എം.എസ്​ മിധുന്‍, സച്ചിന്‍ ബേബി, എം.ഡി നിധീഷ് എന്നിവരെയാണ് ടീമുകൾ സ്വന്തമാക്കിയത്. എന്നാൽ ഇന്നലെ ലേലത്തിൽ വന്ന മലയാളി താരം വിഷ്ണു വിനോദിനെ ആരും ടീമിൽ എടുത്തില്ല. കേരള ടീം ക്യാപ്റ്റൻ സച്ചിൻ ബേബിയെ 20 ലക്ഷം രൂപക്ക് ഹൈദരാബാദ് സ്വന്തമാക്കിയപ്പോൾ കെ.എം ആസിഫിനെ ചെന്നൈ സൂപ്പര്‍ കിങ്​സ്​ 40 ലക്ഷം രൂപക്ക്​ ടീമിലെത്തിച്ചു.

എം.എസ്​ മിധുനെ രാജസ്ഥാനും എം.ഡി നിധീഷിനെ മുംബൈയും സ്വന്തമാക്കി. ഇരുവർക്കും അടിസ്ഥാന വിലയായ 20 ലക്ഷമാണ് പ്രതിഫലം. ആദ്യമായാണ് ഇത്രയും മലയാളി താരങ്ങൾ ഐപിഎല്ലിൽ എത്തുന്നത് എന്ന പ്രത്യേകതയും ഉണ്ട്.