ഐപിഎൽ പതിനൊന്നാം സീസണിന് മുന്നോടിയായി നടന്ന താരലേലം അവസാനിച്ചത് ഇന്നലെയാണ്. രണ്ട് ദിവസമായി നടന്ന ലേലത്തിൽ മികച്ച താരങ്ങളെ ടീമിലെത്തിക്കാനുള്ള പരിശ്രമത്തിലായിരുന്നു ഫ്രാഞ്ചൈസികൾ. ഐപിഎല്ലിലെ ഗ്ലാമർ ടീമായ മുംബൈ മികച്ച താരങ്ങളെ സ്വന്തമാക്കിയെങ്കിലും തങ്ങളുടെ ടീമിലെ പ്രധാന സാന്നിധ്യമായിരുന്ന ഒരു താരത്തെ നഷ്ട്ടപ്പെടുത്തിയതിൽ ഖേദമുണ്ടെന്ന് വ്യക്തമാക്കി ടീം ഉടമ നിത അംബാനി.

ഐപിഎല്ലിൽ മൂന്ന് തവണ ചാമ്പ്യന്മാരായ മുംബൈ ഇന്ത്യൻസിലെ പ്രധാന താരമായ ഹർഭജൻ സിംഗിനെ നഷ്ട്ടപെടുത്തിയതിലാണ് ടീം ഉടമയ്ക്ക് നിരാശ. ടീം തെരഞ്ഞെടുപ്പിൽ സന്തോഷമുണ്ടെങ്കിലും ഹർഭജനെ ടീമിൽ എത്തിക്കാൻ കഴിയാത്തതിൽ ഖേദമുണ്ടെന്ന് നിത അംബാനി വ്യക്തമാക്കി. മുംബൈ ലേലത്തിന് വിടാതെ മൂന്ന് താരങ്ങളെയാണ് നിലനിർത്തിയത്. ക്യാപ്റ്റൻ രോഹിത് ശർമ്മ, ഓൾറൗണ്ടർ ഹർദിക് പാണ്ഡ്യ, പേസ് ബൗളർ ജസ്പ്രീത് ബുംറ എന്നിവരെയാണ് മുംബൈ നിലനിർത്തിയത്.

ലേലത്തിൽ ചെന്നൈ സൂപ്പർ കിങ്‌സാണ് ഹർഭജനെ സ്വന്തമാക്കിയത്. രണ്ട് കോടി രൂപയ്ക്കാണ് ഭാജിയെ ചെന്നൈ ടീമിലെത്തിച്ചത്. അതേസമയം മുംബൈ ഇന്ത്യൻസിലെ മനോഹരമായ പത്ത് വർഷങ്ങൾക്ക് ഭാജി നന്ദി അറിയിച്ചു.