ദക്ഷിണാഫ്രിക്കയ്‌ക്കെതിരായ രണ്ടാം ഏകദിനത്തില്‍ ടോസ് നേടിയ ഇന്ത്യ ബൗളിംഗ് തെരഞ്ഞെടുത്തു. ആദ്യ ഏകദിനത്തിലെന്നപോലെ മാറ്റമില്ലാതെയാണ് ഇന്ത്യ ഇന്ന് ഇറങ്ങുന്നത്.

അതേസമയം ദക്ഷിണാഫ്രിക്കന്‍ നിരയില്‍ രണ്ടു മാറ്റങ്ങളുണ്ട്. പരിക്കേറ്റ ക്യാപ്ടന്‍ ഫാഫ് ഡുപ്ലെസിക്ക് പകരം ഗയാ സോണ്ടോയാണ് ഇറങ്ങുന്നത്. സോണ്ടോയുടെ ഏകദിന അരങ്ങേറ്റം കൂടിയാണിത്. ആന്‍ഡില്‍ ഫെലൂക്‌വായോയ്ക്ക് പകരം സ്പിന്നര്‍ ടബ്രായിസ് ഷംസിയും ടീമില്‍ ഇടംനേടി. ഡുപ്ലെസിക്ക് പകരം രണ്ട് ഏകദിനങ്ങളുടെ മാത്രം അനുഭവസമ്പത്തുള്ള എയ്ഡന്‍ മര്‍ക്രമാണ് ദക്ഷിണാഫ്രിക്കയെ നയിക്കുന്നത്.

ആദ്യ ഏകദിനത്തിലെ തകര്‍പ്പന്‍ ജയത്തിന്റെ ആത്മവിശ്വാസത്തിലാണ് ഇന്ത്യ. ധവാനും കോഹ്‌ലിയും രഹാനെയുമെല്ലാം ഫോമില്‍ തിരിച്ചെത്തിയത് ഇന്ത്യന്‍ ക്യാമ്പിന് ശുഭസൂചനയാണ്. പൊതുവെ പേസര്‍മാരെ തുണയ്ക്കുന്നതാണ് സെഞ്ചൂറിയനിലെ പിച്ച്.
അമ്പേ പരാജയപ്പെട്ട മധ്യനിരയാണ് ദക്ഷിണാഫ്രിക്കയെ സംബന്ധിച്ച് പ്രധാന വില്ലന്‍. എ.ബി. ഡിവില്ലിയേഴ്‌സിന്റെ അഭാവത്തില്‍ വലയുന്ന ദക്ഷിണാഫ്രിക്കയ്ക്ക് ഡുപ്ലെസിയുടെ അഭാവവും മറ്റൊരു തലവേദനയാണ്.