ഇന്ത്യക്കെതിരായ ഏകദിന പരമ്പരയിലെ ആദ്യ രണ്ട് മത്സരങ്ങളും തോറ്റതിന് പിന്നാലെ പരിക്കും ദക്ഷിണാഫ്രിക്കയെ പ്രതിസന്ധിയിലാക്കുന്നു. ഏകദിന മത്സരങ്ങൾ ആരംഭിക്കുന്നതിന് മുന്നേ തന്നെ സൂപ്പർ താരം എ ബി ഡിവില്ലേഴ്‌സിന് പരിക്കേറ്റിരുന്നു. കഴിഞ്ഞ കളിയിൽ പരിക്ക് മൂലം ക്യാപ്റ്റൻ ഡുപ്ലെസിയും കളിച്ചിരുന്നില്ല. ഇതിന് പിന്നാലെയാണ് പരിക്കേറ്റ വിക്കറ്റ് കീപ്പര്‍ ക്വിന്റണ്‍ ഡിക്കോക്ക് ഏകദിന പരമ്പരയില്‍ നിന്ന് പുറത്തായത്.

ഡിക്കോക്കിന് ഒരു മാസത്തെ വിശ്രമം വേണ്ടിവരുമെന്നാണ് അറിയുന്നത്. അതിനാൽ ഏകദിന പരമ്പരയ്ക്ക് പുറമെ ട്വന്റി ട്വന്റി പരമ്പരയും ഡിക്കോക്കിന് നഷ്ട്ടമാകും. കേപ് ടൗണിൽ നടക്കുന്ന മൂന്നാം ഏകദിനത്തിൽ ക്വിന്റണ്‍ ഡിക്കോക്കിന് പകരം ഹെയന്‍റിച്ച് ക്ലാസ്സനെ ടീമിൽ ഉൾപ്പെടുത്തിയിട്ടുണ്ട്. ആദ്യ മൂന്ന് ഏകദിനത്തിനു ശേഷം ഡിവില്ലേഴ്‌സ് തിരിച്ചെത്തുമെന്നാണ് റിപ്പോർട്ട്.

ടെസ്റ്റ് പരമ്പര തോറ്റതിൽ നിന്നും പാഠം ഉൾക്കൊണ്ട ഇന്ത്യൻ ടീം മികച്ച ഫോമിലാണ്. ആദ്യ രണ്ട് മത്സരങ്ങളും ജയിച്ച ഇന്ത്യ ആദ്യമായി ദക്ഷിണാഫ്രിക്കയിൽ ഏകദിന പരമ്പര നേടാനുള്ള തയാറെടുപ്പിലാണ്. മികച്ച വിജയം സ്വാന്തമാക്കിയാൽ ഏകദിനത്തിൽ ഇന്ത്യയ്ക്ക് ഒന്നാം സ്ഥാനത്തെത്താം.