വിജയ് ഹസാരെ ട്രോഫിയില്‍ കേരളത്തിന് അപ്രതീക്ഷിത തോൽവി. അവസാന പന്ത് വരെ ആവേശം നിറഞ്ഞു നിന്ന മത്സരത്തിൽ ഒരു വിക്കറ്റിനാണ് ഹിമാചൽ പ്രദേശ് ജയിച്ചത്. കേരളം അനായാസം ജയിക്കുമെന്ന് കരുതിയ മത്സരമായിരുന്നു വെടിക്കെട്ട് ബാറ്റിങ്ങിലൂടെ അങ്കിത് കൗശിക് ഹിമാചലിന് അനുകൂലമാക്കിയത്.

ആദ്യം ബാറ്റ് ചെയ്ത കേരളം സച്ചിന്‍ ബേബി(95), വിഷ്ണു വിനോദ്(66) എന്നിവരുടെ ബാറ്റിംഗ് മികവില്‍ 271 റണ്‍സ് നേടി. എന്നാൽ സഞ്ജു സാംസൺ അടക്കമുള്ളവർ ബാറ്റിങ്ങിൽ പരാജയപെട്ടു. സഞ്ജു 10 റൺസ് നേടി പുറത്തായി. മറുപടി ബാറ്റിംഗിനിറങ്ങിയ ഹിമാചലിന്റെ മുൻ നിര താരങ്ങളെ മടക്കി അക്ഷയ് കെസി കേരളത്തിന് പ്രതീക്ഷ നൽകി. വാലറ്റത്തെ കെഎം ആസിഫ് എറിഞ്ഞിട്ടതോടെ കേരളം ജയം മണത്തു.

എന്നാൽ അവസാന ബാറ്റ്സ്മാനെ കാഴ്ചക്കാരനാക്കി നിർത്തി തകർത്തടിച്ച അങ്കിത് കൗശിക് ഹിമാചലിന് വിജയം നേടി കൊടുത്തു. അങ്കിത് കൗശിക് 83 റണ്‍സുമായി പുറത്താകാതെ നിന്നു. കേരളത്തിന് വേണ്ടി അക്ഷയ് കെസി നാലും ആസിഫ് മൂന്നും സന്ദീപ് വാര്യർ രണ്ടും വിക്കറ്റ് വീഴ്ത്തി.