ചരിത്ര നേട്ടം ലക്ഷ്യമിട്ട് ഇന്ത്യ; നാലാം ഏകദിനത്തിൽ ഇന്ത്യയ്ക്ക് ബാറ്റിംഗ്; ശ്രേയസ് അയ്യർ ടീമിൽ
ദക്ഷിണാഫ്രിക്കയിൽ ഏകദിന പരമ്പര വിജയം നേടുകയെന്ന ചരിത്ര നേട്ടം ലക്ഷ്യമിട്ട് ഇന്ത്യ ഇറങ്ങുന്നു. ജോഹന്നാസ്ബർഗിൽ നടക്കുന്ന നാലാം ഏകദിനത്തിൽ ടോസ് നേടിയ ഇന്ത്യ ബാറ്റിംഗ് തെരഞ്ഞെടുത്തു. ഇന്ത്യൻ നിരയിൽ കേദാർ ജാദവിന് പകരം ശ്രേയസ് അയ്യർ ടീമിൽ ഇടം നേടി.
ദക്ഷിണാഫ്രിക്കയ്ക്ക് ആശ്വാസമായി വെടിക്കെട്ട് ബാറ്റ്സ്മാൻ ഡിവില്ലേഴ്സ് പരിക്ക് മാറി ടീമിൽ തിരിച്ചെത്തി. ആദ്യ മൂന്ന് ഏകദിനങ്ങളും ജയിച്ച ഇന്ത്യയ്ക്ക് ഇന്നത്തെ മത്സരം ജയിച്ചാൽ പരമ്പര സ്വന്തമാക്കാം. എന്നാൽ മറുവശത്ത് ദക്ഷിണാഫ്രിക്കയ്ക്ക് ഇത് അഭിമാന പോരാട്ടമാണ്. ജയത്തോടെ പരമ്പരയിലേക്ക് തിരിച്ചുവരാനുള്ള ശ്രമത്തിലാണ് ദക്ഷിണാഫ്രിക്ക.
മുൻനിര താരങ്ങൾക്കേറ്റ പരിക്കാണ് ദക്ഷിണാഫ്രിക്കയ്ക്ക് തിരിച്ചടിയായത്. ക്യാപ്റ്റൻ ഡുപ്ലെസി പരിക്ക് മൂലം കളിക്കുന്നില്ല. വിക്കറ്റ് കീപ്പർ ഡീക്കൊക്കും പരിക്കിന്റെ പിടിയിലാണ്. ടീമിൽ തിരിച്ചെത്തിയ ഡിവില്ലേഴ്സിലാണ് ദക്ഷിണാഫ്രിക്കയുടെ പ്രതീക്ഷ.
https://www.facebook.com/Malayalivartha