ഓസ്‌ട്രേലിയൻ താരം ക്രിസ് ലിന്നിന്റെ പരിക്ക് കൊൽക്കത്തയ്ക്ക് കനത്ത തിരിച്ചടിയായി. ഐപിഎല്ലിൽ കോടികൾ മുടക്കി സ്വന്തമാക്കിയ താരമാണ് ക്രിസ് ലിന്‍. ഇന്ന് നടന്ന ത്രിരാഷ്ട്ര ട്വന്റി 20 ഫൈനലിൽ ഫീൽഡ് ചെയ്യുന്നതിനിടെയാണ് ലിന്നിന്റെ വലത് തോളിന് പരിക്കേറ്റത്.

പരിക്കേറ്റ ഉടനെ താരം കളി അവസാനിപ്പിച്ച് പവലിനിയിലേക്ക് മടങ്ങി. പരിക്കിനെ പറ്റി കൂടുതൽ വിവരങ്ങൾ ലഭ്യമല്ലെങ്കിലും ഗുരുതരമായ പരിക്കാണെന്നാണ് വിവരം. ഇതോടെ താരത്തിന് ഐപിഎൽ നഷ്ടമാകാനാണ് സാധ്യത. ഇത് കൊൽക്കത്തയ്ക്ക് കനത്ത തിരിച്ചടിയാകും.

കഴിഞ്ഞ മാസം നടന്ന താരലേലത്തില്‍ 9.6 കോടി രൂപയ്ക്കാണ് താരത്തെ കൊല്‍ക്കത്ത ടീമിലെത്തിച്ചത്. ഒരു ഓസ്ട്രേലിയന്‍ താരത്തിന് ലഭിക്കുന്ന ഏറ്റവും ഉയര്‍ന്ന തുകയാണിത്. ഏറെ നാളായി പരിക്ക് വേട്ടയാടുന്ന വലത് തോളിന് തന്നെയാണ് വീണ്ടും പരിക്കേറ്റിരിക്കുന്നത് എന്നത് കൂടുതൽ ആശങ്കയ്ക്ക് ഇടനൽകുന്നു.