വിജയ് ഹസാരെ കിരീടം കർണാടകയ്ക്ക്. ഫൈനലിൽ സൗരാഷ്ട്രയെ 41 റൺസിന് തകർത്താണ് കർണാടക വിജയം സ്വന്തമാക്കിയത്.കര്‍ണാടക ഉയര്‍ത്തിയ 253 റണ്‍സ് വിജയലക്ഷ്യത്തിന് മുന്നില്‍ സൗരാഷ്ട്ര 212 റണ്‍സിന് എല്ലാവരും പുറത്താവുകയായിരുന്നു.

സൗരാഷ്ട്ര നായകൻ ചേതേശ്വർ പൂജാരയുടെ ഒറ്റയാൾ പോരാട്ടം വിഫലമായി. 94 റണ്‍സുമായി ചേതേശ്വര്‍ പൂജാര ടീമിന്റെ ടോപ് സ്കോറര്‍ ആയി. ആദ്യം ബാറ്റ് ചെയ്ത കർണാടക 253 റണ്‍സ് നേടി. മയാംഗ് അഗര്‍വാൾ നേടിയ 90 റണ്‍സാണ് ടീമിനെ 250 കടത്തിയത്. രവികുമാര്‍ സമര്‍ത്ഥ്(48), പവന്‍ ദേശ്പാണ്ഡേ(49) എന്നിവരും മികച്ച പ്രകടനം നടത്തി. സൗരാഷ്ട്രയ്ക്ക് വേണ്ടി കമലേഷ് 4 വിക്കറ്റ് നേടി.

മറുപടി ബാറ്റിങ്ങിനിറങ്ങിയ സൗരാഷ്ട്രയ്ക്ക് വേണ്ടി നായകൻ പൂജാര മാത്രമാണ് മികച്ച ബാറ്റിംഗ് പുറത്തെടുത്തത്. പുജാരയ്ക്ക് പിന്തുണ നൽകാൻ മറ്റ് ബാറ്റ്‌സ്മാന്മാർക്ക് കഴിയാതെ വന്നതോടെ സൗരാഷ്ട്ര 212 റണ്‍സിനു ഓള്‍ഔട്ട് ആവുകയായിരുന്നു. കര്‍ണ്ണാടകയ്ക്കായി കൃഷ്ണപ്പ ഗൗതം, പ്രസിദ്ധ കൃഷ്ണ എന്നിവര്‍ രണ്ട് വിക്കറ്റ് നേടി.