കേരള ബ്ലാസ്‌റ്റേഴ്‌സ് പരിശീലകന്‍ ഡേവിഡ് ജയിംസിനെ ടീം മാനേജ്‌മെന്റ് പുറത്താക്കി
കേരള ബ്ലാസ്‌റ്റേഴ്‌സ് പരിശീലകന്‍ ഡേവിഡ് ജയിംസിനെ ടീം മാനേജ്‌മെന്റ് പുറത്താക്കി. സീസണിലെ ബ്ലാസ്‌റ്റേഴ്‌സിന്റെ മോശം പ്രകടനം തുടരുന്ന സാഹചര്യത്തിലാണ് പരിശീലകനെ ഒഴിവാക്കാന്‍ മാനേജ്‌മെന്റ് തീരുമാനിച്ചത്.
കഴിഞ്ഞ ദിവസം മുംബൈയ്‌ക്കെതിരേ കേരള ബ്ലാസ്‌റ്റേഴ്‌സ് ഒന്നിനെതിരേ ആറു ഗോളുകള്‍ക്ക് തോല്‍വി ഏറ്റുവാങ്ങിയിരുന്നു. ഇതും ജയിംസിന് തിരിച്ചടിയായി. ഐ.എസ്.എല്‍ നാലാം സീസണില്‍, 2018 ജനുവരിയില്‍ കേരളാ ബ്ലാസ്‌റ്റേഴ്‌സ് മുഖ്യ പരിശീലകനായി ചുമതലയേറ്റ ഡേവിഡ് ജെയിംസ്, നിര്‍ണ്ണായക ഘട്ടത്തില്‍ ടീമിന് ആത്മവിശ്വാസം നല്‍കി മുന്നോട്ട് നയിച്ചിരുന്നു. ഡേവിഡ് ജെയിംസ് ടീമിന് നല്‍കി വന്ന സേവനത്തില്‍ കേരളാ ബ്ലാസ്‌റ്റേഴ്‌സ് നന്ദി പ്രകാശിപ്പിക്കുന്നതായും മുന്നോട്ടുള്ള അദ്ദേഹത്തിന്റെ പ്രയാണത്തിന് എല്ലാ ആശംസകളും നല്‍കുന്നതായും കേരളാ ബ്ലാസ്‌റ്റേഴ്‌സ് ചീഫ് എക്‌സിക്യൂട്ടീവ് ഓഫീസര്‍ വരുണ്‍ ത്രിപുരനേനി അറിയിച്ചു.
ക്ലബ്ബിനോടൊപ്പമുള്ള നാളുകളില്‍, ടീമംഗങ്ങളും, മാനേജ്‌മെന്റും നല്‍കി വന്ന പിന്‍തുണയ്ക്കും , സഹായങ്ങള്‍ക്കും പൂര്‍ണ്ണ സംതൃപ്തളയും നന്ദിയും അറിയിച്ച ഡേവിഡ് ജെയിംസ് കേരളാ ബ്ലാസ്‌റ്റേഴ്‌സിന് എല്ലാ ആശംസകളും നേര്‍ന്നുകൊണ്ടാണ് ടീമില്‍ നിന്നുള്ള വിടവാങ്ങല്‍ അറിയിച്ചത്. കേരളാ ബ്ലാസ്‌റ്റേഴ്‌സ് ആരാധകരുടെ പിന്‍തുണയില്‍ സ്‌നേഹ നിര്‍ഭരമായ നന്ദിയും അദ്ദേഹം രേഖപ്പെടുത്തി.
https://www.facebook.com/Malayalivartha
