ഇറ്റാലിയന്‍ ഫുട്ബാള്‍ ലീഗില്‍ യുവന്റസിന് തുടര്‍ച്ചയായ ഒമ്പതാം കിരീടം. രണ്ട് മത്സരങ്ങള്‍ ശേഷിക്കേയാണ് മൗറീസിയോ സാരിയും സംഘവും കിരീടമുയര്‍ത്തിയത്. മത്സരത്തില്‍ വിജയിച്ചതോടെ രണ്ടാം സ്ഥാനക്കാരായ ഇന്റര്‍ മിലാനേക്കാള്‍ (76) യുവെക്ക് (83) ഏഴു പോയന്റ് ലീഡായി. ശേഷിക്കുന്ന രണ്ട് മത്സരങ്ങളില്‍ വിജയിച്ചാല്‍ പോലും അവര്‍ക്ക് യുവന്റസിനെ മറികടക്കാനാകില്ല. ആദ്യ പകുതിയുടെ ഇഞ്ച്വറി സമയത്ത് ക്രിസ്റ്റിയാനോയും 67ാം മിനിറ്റില്‍ ഫെഡറികോ ബെര്‍നാര്‍ഡെഷിയുമാണ് യുവെക്കായി വലകുലുക്കിയത്. മത്സരാന്ത്യത്തില്‍ റൊണാള്‍ഡോ പെനാല്‍റ്റി പാഴാക്കിയെങ്കിലും ജേതാക്കള്‍ മൂന്ന് പോയന്റ് ഉറപ്പാക്കിയിരുന്നു.

സീസണില്‍ യുവന്റസിനായി റോണോ നേടുന്ന 31ാം ലീഗ് ഗോളായിരുന്നു മത്സരത്തിലേത്. 1933-34 സീസണില്‍ 32 ഗോളുകള്‍ നേടിയ ഫെലിസ് ബോറല്‍ മാത്രമാണ് ഇക്കാര്യത്തില്‍ റോണോയുടെ മുമ്പിലുള്ളത്. ലോക്ഡൗണിന് ശേഷം താരം നേടുന്ന 10ാം ഗോളാണിത്.

യൂറോപ്പിലെ മുന്‍നിര ലീഗുകളില്‍ മറ്റാരും താരത്തിനൊപ്പമില്ല. ഒമ്പത് ഗോളുമായി മാഞ്ചസ്റ്റര്‍ സിറ്റിയുടെ റഹീം സ്‌റ്റെര്‍ലിങും ബയേണ്‍ മ്യൂണിക്കിന്റെ റോബര്‍ട് ലെവന്‍ഡോസ്‌കിയുമാണ് പോര്‍ചുഗീസ് താരത്തിന് പിറകിലുള്ളത്.