എഫ്.എ കപ്പ് 14-ാം തവണയും സ്വന്തമാക്കി പീരങ്കിപ്പട; തോല്പിച്ചത് ചെല്സിയെ; എമറിക് ഒബമെയാങ്ങിന്റെ ഇരട്ട ഗോള് വിജയം സമ്മാനിച്ചു
എഫ്.എ കപ്പിനായുള്ള പോരാട്ടത്തില് ആഴ്്സണലിന് വിജയം. ലണ്ടനിലെ വെംബ്ലി സ്റ്റേഡിയത്തില് നടന്ന മത്സരത്തില് ഒന്നിനെതിരേ രണ്ടു ഗോളുകള്ക്കായിരുന്നു പീരങ്കിപ്പട ചെല്സിയെ തറപ്പറ്റിച്ചത്. ജയത്തോടെ 14-ാം തവണയും എഫ്.എ കപ്പില് മുത്തമിടാന് ആഴ്സണലിന് സാധിച്ചു. ഇരട്ട ഗോളുമായി തിളങ്ങിയ എമറിക് ഒബമെയാങ്ങാണ് ആഴ്സണലിന്റെ വിജയശില്പി. മത്സരം ആരംഭിച്ച് അഞ്ചാം മിനിറ്റില് തന്നെ ആഴ്സണലിനെ ഞെട്ടിച്ച് ചെല്സിയാണ് മുന്നിലെത്തിയത്. ഒളിവര് ജിറൂദിന്റെ പാസ് വലയിലെത്തിച്ച് ക്രിസ്റ്റ്യന് പുലിസിച്ചാണ് ലാംപാര്ഡിന്റെ പടയെ മുന്നിലെത്തിച്ചത്. എന്നാല് 28ാം മിനിറ്റില് ലഭിച്ച പെനാല്റ്റി വലയിലെത്തിച്ച് ഒബമെയാങ് ആഴ്സണലിനെ ഒപ്പമെത്തിച്ചു. 67ാം മിനിറ്റില് അദ്ദേഹം തന്നെ പീരങ്കിപ്പടയുടെ വിജയഗോളും നേടി.73-ാം മിനിറ്റില് രണ്ടാം മഞ്ഞക്കാര്ഡ് കണ്ട് കൊവാച്ചിച്ച് പുറത്തായതും നീലപ്പടയ്ക്ക് തിരിച്ചടിയായി. അഞ്ചാം മിനുറ്റില് ക്രിസ്റ്റ്യന് പുലിസിച്ചിലൂടെ ആദ്യ ഗോള് നേടിയ ശേഷം ആയിരുന്നു ചെല്സിയുടെ തോല്വി.
ആഴ്സണലും ചെല്സിയും എഫ്.എ കപ്പ് ഫൈനലില് ഏറ്റുമുട്ടുന്നത് ഇത് മൂന്നാം തവണയാണ്. മൂന്നു തവണയും ജയം ആഴ്സണലിനൊപ്പവും. 2002, 2017 വര്ഷങ്ങളിലാണ് ഇരുവരും ഇതിനു മുമ്പ് എഫ്.എ കപ്പ് ഫൈനലില് മുഖാമുഖം വന്നത്. 2019 ലെ യുവേഫ യൂറോപ്പ ലീഗ് ഫൈനലിലെ തോല്വിക്ക് പകരം വീട്ടാനും ഇതോടെ ആഴ്സണലിനായി. ആഴ്സണലിനൊപ്പം പരിശീലകന് മൈക്കല് അര്ട്ടേറ്റയുടെ ആദ്യ കിരീടമാണിത്. 2014, 2015 വര്ഷങ്ങളില് എഫ്.എ കപ്പ് നേടിയ ആഴ്സണല് ടീമില് അംഗമായിരുന്നു ആര്ട്ടേറ്റ.
ആഴ്സണലിനെ സംബന്ധിച്ച് ഏറെ നിര്ണായകമായിരുന്നു ഈ ഫൈനല്. കാരണം കഴിഞ്ഞ 25 വര്ഷത്തിനിടെ ആദ്യമായാണ് പീരങ്കിപ്പട പ്രീമിയര് ലീഗ് പോയന്റ് പട്ടികയില് ആദ്യ ആറില് നിന്ന് പുറത്താകുന്നത്. അതിനാല് തന്നെ യുറോപ്പ ലീഗില് ഇടംനേടാന് അവര്ക്ക് എഫ്.എ കപ്പ് ജയം ആവശ്യമായിരുന്നു. ഏറ്റവും കൂടുതല് തവണ എഫ്എ കപ്പ് നേടുന്ന ടീമാണ് ആഴ്സണല്. 12 കിരീടങ്ങളുമായി മാഞ്ചസ്റ്റര് യുണൈറ്റഡാണ് കിരീടനേട്ടത്തില് രണ്ടാമത്. എഫ്എ കപ്പ് ചരിത്രത്തില് ഏറ്റവും കൂടുതല് കലാശപ്പോര് കളിച്ചതും ആഴ്സണല് ആണ്. ആഴ്സണല് 21 തവണ ഫൈനലില് കളിച്ചിട്ടുണ്ട്. വളരെ വലിയൊരു ആരാധകവൃന്ദം ആഴ്സണലിനുണ്ട്. ലോകത്തിലെ ഏറ്റവും സമ്പന്നമായ അഞ്ചാമത്തെ ഫുട്ബോള് ക്ലബ്ബാണ് ആഴ്സണല്.
https://www.facebook.com/Malayalivartha