സൂപ്പര്‍ താരം ലയണല്‍ മെസിയുടെ ഹാട്രിക് മികവില്‍ ഖത്തര്‍ ലോകകപ്പ് യോഗ്യതാ റൗണ്ടില്‍ അര്‍ജന്റീനയ്ക്കു മിന്നും ജയം. എതിരില്ലാത്ത മൂന്നു ഗോളുകള്‍ക്ക് അര്‍ജന്റീന ബൊളീവിയയെ തകര്‍ത്തു.

അര്‍ജന്റീനയുടെ മൂന്നു ഗോളുകളും നേടിയ ക്യാപ്റ്റന്‍ മെസി ഫുട്‌ബോള്‍ ഇതിഹാസം പെലെയുടെ റിക്കാര്‍ഡും മറികടന്നു. ലാറ്റിനമേരിക്കയില്‍ ഏറ്റവും കൂടുതല്‍ രാജ്യാന്തര ഗോളുകള്‍ നേടിയ താരം എന്ന റിക്കാര്‍ഡാണ് മെസി സ്വന്തം പേരിലാക്കിയത്.

പെലെ രാജ്യത്തിനായി 77 ഗോള്‍ നേടിയപ്പോള്‍ മെസിയുടെ അക്കൗണ്ടില്‍ 80 ഗോളുകളായി. 153 മത്സരങ്ങളില്‍നിന്നാണ് മെസി നേട്ടം സ്വന്തമാക്കിയത്. ഏറ്റവും കൂടുതല്‍ രാജ്യാന്തര ഗോളുകളുടെ ലോകറിക്കാര്‍ഡ് ക്രിസ്റ്റ്യാനോ റൊണാള്‍ഡോയുടെ പേരിലാണ്.

റോണോ ഇതുവരെ 180 മത്സരങ്ങളില്‍നിന്നായി 111 ഗോളുകളാണ് നേടിയിരിക്കുന്നത്. മത്സരത്തിന്റെ 14 ാം മനിറ്റില്‍ തന്നെ എണ്ണംപറഞ്ഞൊരു ഗോളില്‍ മെസി അര്‍ജന്റീനയെ മുന്നിലെത്തിച്ചു.

ബോക്‌സിനു വെളിയില്‍ നിന്നും മനോഹരമായ ഇടംകാലന്‍ ഷോട്ട് വലയില്‍ താഴ്ന്നിറങ്ങി. രണ്ടാം പകുതിയില്‍ (64) പന്തുമായി ബോക്‌സിനുള്ളിലേക്ക് കടന്ന മെസി വളഞ്ഞുപിടിച്ച പ്രതിരോധനിരക്കാരെ വെട്ടിച്ച് പന്ത് വലയിലാക്കി.