ലോകകപ്പ് യോഗ്യതാ റൗണ്ട് മത്സരത്തില് അര്ജന്റീനയ്ക്ക് തോല്വി
ലോകകപ്പ് യോഗ്യതാ റൗണ്ട് മത്സരത്തില് ബൊളീവിയക്കെതിരെ അര്ജന്റീനയ്ക്ക് നാണംകെട്ട തോല്വി. എതിരില്ലാത്ത രണ്ടു ഗോളിനാണ് ബൊളീവിയ അര്ജന്റീനയെ കെട്ടുകെട്ടിച്ചത്. മെസിയില്ലാതെ ഇറങ്ങിയ അര്ജന്റൈന് ടീം ബൊളീവിയക്കെതിരെ പിടിച്ചു നില്ക്കാന് നന്നേ പാടുപെട്ടു. കളിയുടെ 29ാം മിനിറ്റില് നീലപ്പടക്ക് മുന്നിലെത്താനുള്ള വഴി തുറന്നതാണ്. പക്ഷേ, എയ്ഞ്ചല് ഡി മരിയയുടെ ഷോട്ട് ബൊളീവിയന് ഗോളി തടുത്തിട്ടു.
രണ്ടു മിനിറ്റ് കഴിയും മുന്പേ ബൊളീവിയ അക്കൗണ്ട് തുറന്നു. ജുവാന് കാര്ലോസ് ആര്സാണ് ബൊളീവിയയെ മുന്നിലെത്തിച്ചത്. രണ്ടാം പകുതിയില് മാര്സെലോ മൊറീഞ്ഞോയാണ് അര്ജന്റീനയുടെ മേല് അവസാന ആണിയടച്ചത്. മെസിയില്ലാതെ ആടിയുലഞ്ഞ അര്ജന്റീന, ബൊളീവിയ ആദ്യ ഗോള് നേടിയപ്പോള് തന്നെ പരാജയം മണത്തിരുന്നു.
ചിലിക്കെതിരേയുള്ള ലോകകപ്പ് യോഗ്യതാ മത്സരത്തില് അസിസ്റ്റന്റ് റഫറിക്കെതിരേ മോശം വാക്പ്രയോഗം നടത്തിയതിനാണ് മെസിക്ക് വിലക്ക് നേരിടേണ്ടി വന്നത്. നാല് അന്താരാഷ്ട്ര മത്സരങ്ങളില് നിന്നാണ് സൂപ്പര് താരത്തെ വിലക്കിയിരിക്കുന്നത്. മെസിക്കു പുറമെ ഗോണ്സാലോ ഹിഗ്വെയ്ന്, ഹാവിയര് മസ്കരാനോ, ലൂകാസ് ബിഗ്ലിയ, നിക്കോളസ് ഒട്ടാമെന്ഡി എന്നിവരുമില്ലാതെയാണ് അര്ജന്റീന ബൊളീവിയക്കെതിരെ മത്സരത്തിനിറങ്ങിയത്.
https://www.facebook.com/Malayalivartha