കാര്‍ഡിഫ് സ്‌റ്റേഡിയത്തില്‍ ഇന്ന് കാല്‍പന്തുകളിയുടെ ആവേശപ്പോരാട്ടം. ലോകത്തെ ഏറ്റവും പ്രധാനപ്പെട്ട കിരീടങ്ങളിലൊന്നായ ചാമ്പ്യന്‍സ് ലീഗിനായി ഇനി മണിക്കൂറുകള്‍ മാത്രം കാത്തിരുന്നാല്‍ മതി. നിലവിലെ ചാമ്പ്യന്‍മാരായ റയല്‍മാഡ്രിഡ് കിരീടം നിലനിര്‍ത്താനിറങ്ങുമ്പോള്‍ ഇറ്റാലിയന്‍ വമ്പന്‍മാരായ യുവന്റസ് സ്വപ്‌നകിരീടം സ്വന്തമാക്കാനാണ് പടച്ചട്ടയണിയുന്നത്. ആധുനിക കാല്‍പ്പന്തുകളിയിലെ കരുത്തരായ റയലും യുവന്റസും ഏറ്റുമുട്ടുമ്പോള്‍ വെയില്‍സിലെ കാര്‍ഡിഫ് സ്‌റ്റേഡിയത്തിനൊപ്പം ആരാധക ഹൃദയങ്ങളിലും ആവേശത്തിന്റെ തീപ്പൊരിപാറും.

തുടര്‍ച്ചയായി 2 തവണ ചാമ്പ്യന്‍സ് ലീഗ് കിരീടം നേടാനാണ് സിനദിന്‍ സിദാനും സംഘവും ലക്ഷ്യം. ക്രിസ്റ്റ്യാനോയാകട്ടെ ഒരിക്കല്‍ കൂടി ചാമ്പ്യന്‍സ് ലീഗ് കിരീടത്തില്‍ മുത്തമിടുന്നതിനൊപ്പം ബാലണ്‍ ഡിയോര്‍ കൂടി ലക്ഷ്യമിടുന്നു. കരുത്തുറ്റ താരനിര തന്നെയാണ് റയലിന്റെ കരുത്ത്. വമ്പന്‍ മത്സരങ്ങളില്‍ ഗോള്‍ മഴ തീര്‍ക്കുന്ന ക്രിസ്റ്റ്യാനോയുടെ ബൂട്ടുകള്‍ ഇക്കുറിയും അത്ഭുതം കാട്ടുമെന്നാണ് റയല്‍ ആരാധകരുടെ പ്രതീക്ഷ.

പുതിയ പ്രതിഭാസം ഇസ്‌കോയും ഗാരത് ബെയ്‌ലും കരീംബെന്‍സേമയും റോഡ്രിഗസും അവസാന നിമിഷങ്ങളില്‍ അത്ഭുതം കാട്ടുന്ന നായകന്‍ സെര്‍ജിയോ റാമോസുമെല്ലാം ചരിത്രം കുറിക്കാന്‍ ശേഷിയുള്ളവരാണ്. മികച്ച കളിക്കാര്‍ മാത്രമുള്ള റയലില്‍ ആദ്യ ഇലവനില്‍ ആരെയൊക്കെ ഉള്‍പ്പെടുത്തുമെന്നുള്ളതാണ് സിദാന്റെ ആശങ്ക.

അതേ സമയം മറുവശത്ത് പരമ്പരാഗതമായ പ്രതിരോധകരുത്തും ഗോള്‍വലയ്ക്ക് മുന്നിലെ ബഫണെന്ന ഇതിഹാസവുമാണ് യുവന്റസിന്റെ യഥാര്‍ത്ഥ ശക്തി. ചാമ്പ്യന്‍സ് ലീഗില്‍ ഒരു മത്സരം പോലും പരാജയപ്പെടാതെയാണ് ഇറ്റാലിയന്‍ ചാമ്പ്യന്‍മാര്‍ കലാശപ്പോരിന് ബൂട്ടികെട്ടുന്നത്. ബി ബി സി യെന്നറിയപ്പെടുന്ന പ്രതിരോധക്കോട്ടയ്ക്ക് മുന്നില്‍ ക്രിസ്റ്റിയാനോയടക്കമുള്ള റയലിന്റെ താരപ്പട നിഷ്പ്രഭമാകുമോ എന്നാണ് ആരാധകരുടെ ആശങ്ക. ജോര്‍ജ്ജിയോ ചില്ലിനിയും ബൊനൂച്ചിയും നേതൃത്വം നല്‍കുന്ന യുവന്റസിന്റെ പ്രതിരോധക്കോട്ട തകര്‍ക്കുക റയലിന് അത്ര എളുപ്പമല്ല.

സൂപര്‍ താരം മെസിക്ക് ശേഷം അര്‍ജന്റീനയുടെ അത്ഭുതമായി മാറുന്ന ഡിബാലയുടെ ബൂട്ടുകള്‍ അത്ഭുതം കാട്ടുമെന്നാണ് പ്രതീക്ഷ. ഹിഗൈ്വന്റെ പിന്തുണകൂടിയാകുന്നതോടെ റയല്‍ പ്രതിരോധം വിയര്‍ക്കുമെന്ന കാര്യം ഉറപ്പാണ്.

യൂറോപ്പിലെ ഈ അവിസ്മരണീയ പോരാട്ട രാവ് കളിമികവ് കൊണ്ട് അത്ഭുതങ്ങള്‍ സൃഷ്ട്ടിക്കുമെന്നതില്‍ തര്‍ക്കമില്ല. ഇന്ത്യന്‍ സമയം രാത്രി 12.15നാണ് മത്സരം.
കലാശപ്പോരാട്ടം ഇന്ന്