ഡ്രോണ്‍ ആക്രമണമുണ്ടാകുമെന്ന  ഇന്റലിജന്‍സ് വിഭാഗത്തിന്റെ മുന്നറിപ്പിനെ തുടര്‍ന്ന് ഭയത്തോടെയാണ് അടച്ചിട്ട മേല്‍ക്കൂരയ്ക്ക് കീഴില്‍ കാര്‍ഡിഫില്‍ പ്രിന്‍സിപ്പാളിറ്റി സ്‌റ്റേഡിയത്തില്‍ പതിനായിരക്കണക്കിന് ആരാധകര്‍ റയലും യുവന്റസും തമ്മിലുള്ള കലാശ പോരാട്ടം കാണാനെത്തിയത്.

കളി തുടങ്ങി 20ാം മിനിറ്റിലായിരുന്നു ക്രിസ്റ്റ്യാനോയുടെ ആദ്യ ഗോള്‍. ആദ്യ മിനിറ്റുകളില്‍ പന്ത് കിട്ടാതെ ഉഴറി നടന്ന റയലിന് മത്സരച്ചൂട് പകര്‍ന്നതായിരുന്നു റയലിന്റെ കൗണ്ടര്‍അറ്റാക്ക്. അതിവേഗ നീക്കങ്ങളുമായി യുവന്റസിന്റെ ഗോള്‍ മുഖത്തെത്തിയ പന്ത് ഡാനി കാര്‍വജാലിലേക്ക്. പിന്നെ റൊണാള്‍ഡോയുടെ കാലുകളിലേക്ക് ഒരു അതിവേഗ പാസ്. ആ പാസ് യുവന്റസ് പോസ്റ്റിന്റ ഇടതുമൂലയിലേക്ക് പായിച്ച് യുവന്റസ് പ്രതിരോധ താരത്തിന്റെ കാലില്‍ തട്ടി ചെറുതായി ദിശ മാറിയ പന്ത് ബഫണിനെ കബളിപ്പിച്ച് വലയിലേക്ക്. 

64ാം മിനിറ്റില്‍ ക്രിസ്റ്റ്യാനോയുടെ രണ്ടാമത്തെ ഗോള്‍ അവതരിച്ചു. ഇത്തവണ മിന്നല്‍ വേഗതയില്‍ തകര്‍പ്പനൊരു ക്ലോസ് റേഞ്ച് ഗോളാണ് പോര്‍ച്ചുഗീസ് താരത്തിന്റെ കാലില്‍ നിന്ന് പിറന്നത്. വലതു വിങ്ങിലൂടെ കുതിച്ചു കയറിയ ലൂക്ക മോഡ്രിച്ച് പന്ത് ബോക്‌സിലേക്ക് മറിക്കുമ്പോള്‍ പറന്നെത്തിയ റൊണാള്‍ഡോക്ക് ലക്ഷ്യം തെറ്റിയില്ല. റൊണാള്‍ഡൊയുടെ കരിയറിലെ 600ാം ഗോള്‍ പിറന്നത് അവിടെയാണ്.

ആ ഇരട്ടഗോളോടെ ഒരു മഴവില്‍ റെക്കോര്‍ഡാണ് ക്രിസ്റ്റ്യാനോ കാര്‍ഡിഫില്‍ പിന്നിട്ടത്. ഏഴു വ്യത്യസ്ത നിറങ്ങളിലുള്ള റെക്കോര്‍ഡ്. മെസ്സിയെയും പിന്തള്ളിയാണ് പോര്‍ച്ചുഗീസ്താരം ക്രിസ്റ്റ്യാനോ ആ മഴവില്‍ റെക്കോര്‍ഡിട്ടത്.