രണ്ടാമത്തെ വനിതാ പ്രീമിയര്‍ ലീഗ് ക്രിക്കറ്റില്‍ വരവറിയിച്ച് മൂന്ന് മലയാളിതാരങ്ങള്‍. ബാംഗ്ലൂര്‍ റോയല്‍ ചലഞ്ചേഴ്സിനായി ആശ ശോഭന, മുംബൈ ഇന്ത്യന്‍സിനായി എസ് സജന, ഡല്‍ഹി ക്യാപിറ്റല്‍സിനായി മിന്നുമണി എന്നിവരാണ് കളിച്ചത്. ഈ പ്രകടനമികവില്‍ ഇന്ത്യന്‍ ടീം സ്വപ്നം കാണുകയാണ് സജനയും ആശയും. മിന്നു നേരത്തേ ദേശീയ കുപ്പായമണിഞ്ഞിട്ടുണ്ട്.

ബാംഗ്ലൂരിന്റെ കിരീടനേട്ടത്തില്‍ വലംകൈ സ്പിന്നറായ ആശയുടെ പ്രകടനം നിര്‍ണായകമായി മാറി. 10 കളിയില്‍ 12 വിക്കറ്റാണ് സമ്പാദ്യം. കൂടുതല്‍ വിക്കറ്റ് നേടിയ ശ്രേയങ്ക പാട്ടീലിനെക്കാള്‍ ഒന്നുമാത്രം കുറവ്.

തിരുവനന്തപുരം പേരൂര്‍ക്കട സ്വദേശിയായ മുപ്പത്തിമൂന്നുകാരി യുപി വാരിയേഴ്സിനെതിരെ അഞ്ച് വിക്കറ്റ് നേടി കളിയിലെ താരമായി. ഒരു ഇന്ത്യന്‍ താരത്തിന്റെ ആദ്യ അഞ്ച് വിക്കറ്റ് നേട്ടമാണ്. എലിമിനേറ്ററില്‍ അവസാന ഓവര്‍ എറിഞ്ഞ ആശയാണ് മുംബൈ ഇന്ത്യന്‍സിനെതിരെ അപ്രതീക്ഷിത വിജയം സമ്മാനിച്ചത്. ഫൈനലില്‍ മൂന്ന് ഓവറില്‍ 14 റണ്‍ വഴങ്ങി രണ്ട് വിക്കറ്റെടുത്തു. കഴിഞ്ഞ സീസണിലും ആശ ബാംഗ്ലൂര്‍ ടീമിലുണ്ടായിരുന്നു. വയനാട് മാനന്തവാടി സ്വദേശിയായ സജനയുടെ ആദ്യ അവസരമാണ്. അത് നന്നായി വിനിയോഗിച്ച സന്തോഷത്തിലാണ്. കളത്തില്‍ ഓള്‍റൗണ്ട് മികവ് കാഴ്ചവയ്ക്കാനായി. വലംകൈ ബാറ്ററും സ്പിന്‍ ബൗളറുമാണ്.

ഉദ്ഘാടനമത്സരത്തിലെ അവസാന പന്തില്‍ സിക്സറടിച്ച് കളി ജയിപ്പിച്ചാണ് താരമായത്. പിന്നീട് എല്ലാ കളിയിലും അവസരം കിട്ടി. എട്ടാമതായി ഇറങ്ങിയിരുന്ന ഇരുപത്തെട്ടുകാരിയുടെ കളിമിടുക്കിന് അംഗീകാരമായി ഓപ്പണറായും അവസരം കിട്ടി.

ഒമ്പത് കളിയില്‍ ആറെണ്ണത്തിലാണ് ബാറ്റിങ്ങിന് അവസരം കിട്ടിയത്. 87 റണ്ണെടുത്ത് സ്ട്രൈക്ക് റേറ്റില്‍ രണ്ടാമതെത്തി. ഫീല്‍ഡിങ്ങിലും തിളങ്ങി. മികച്ച ക്യാച്ചിനുള്ള പുരസ്‌കാരം നേടി. യുപി വാരിയേഴ്സിന്റെ സോഫി എക്ലസ്റ്റനെ പുറത്താക്കാനെടുത്ത ഡൈവിങ് ക്യാച്ചിനാണ് പുരസ്‌കാരം. രണ്ട് വിക്കറ്റും നേടാനായി. ഡല്‍ഹി ക്യാപിറ്റല്‍സ് നിരയില്‍ മിന്നുമണിക്ക് കിട്ടിയ അവസരം കുറവായിരുന്നു. അഞ്ച് കളിയിലാണ് പന്തെടുത്തത്. വലംകൈ സ്പിന്‍ ബൗളറും ഇടംകൈ ബാറ്ററുമാണ്. വയനാട്ടിലെ മാനന്തവാടിയില്‍നിന്നുള്ള ഇരുപത്തിനാലുകാരിക്ക് മൂന്ന് വിക്കറ്റാണ് നേട്ടം.