ഏഷ്യന്‍  അത്‌ലറ്റിക് ചാമ്പ്യന്‍ഷിപ്പിന് ചൊവ്വാഴ്ച ദക്ഷിണകൊറിയയിലെ ഗുമിയില്‍ തുടക്കം. അഞ്ചുദിവസം നീണ്ടുനില്‍ക്കുന്ന ചാമ്പ്യന്‍ഷിപ്പില്‍ 59 അംഗ ഇന്ത്യന്‍ സംഘമാണ് പങ്കെടുക്കുക.

മെഡല്‍പ്പട്ടികയില്‍ ആദ്യ മൂന്നു സ്ഥാനങ്ങളിലൊന്നാണ് ഇന്ത്യ ലക്ഷ്യമിടുന്നത്. ലോകചാമ്പ്യന്‍ഷിപ്പിന് യോഗ്യതനേടാനുള്ള അവസരംകൂടിയാണ് ഏഷ്യന്‍ മീറ്റ്. ജാവലിന്‍ ത്രോയിലെ ഒളിമ്പിക് ഇരട്ടമെഡല്‍ ജേതാവ് നീരജ് ചോപ്ര ഒഴികെയുള്ള മിക്ക പ്രമുഖതാരങ്ങളും ഇന്ത്യക്കായി മത്സരിക്കാനിറങ്ങുന്നുണ്ട്.

പാരീസ് ഒളിമ്പിക്സില്‍ നീരജിനെ രണ്ടാം സ്ഥാനത്തേക്ക് പിന്തള്ളി സ്വര്‍ണംനേടിയ പാകിസ്താന്റെ അര്‍ഷാദ് നദീം മീറ്റിനുണ്ട്. ഉയര്‍ന്നുവരുന്ന യുവതാരം സച്ചിന്‍ യാദവാണ് ജാവലിനില്‍ ഇന്ത്യയുടെ പോരാട്ടം നയിക്കുന്നത്. സ്റ്റീപ്പില്‍ ചേസിലാണ് ഇന്ത്യക്ക് ഏറെ പ്രതീക്ഷയുള്ളത്. പുരുഷന്മാരില്‍ ദേശീയറെക്കോഡുകാരന്‍ അവിനാഷ് സാബ്ലെ മികച്ചഫോമിലാണെന്നത് ശുഭസൂചനയാണ്.

പ്രധാന എതിരാളി ജപ്പാന്റെ റിയുജി മിയുര മത്സരിക്കാനില്ലെന്നതും അവിനാഷിന് അനുകൂലഘടകമാണ്. വനിതകളില്‍ നിലവിലെ ജേതാവായ പാരുള്‍ ചൗധരിയും ഇന്ത്യയുടെ ഉറച്ചപ്രതീക്ഷയാണ്. എന്നാല്‍, ഒളിമ്പിക് ചാമ്പ്യന്‍ ബഹ്റൈന്റെ വിന്‍ഫെഡ് യാവി പാരുളിന് കടുത്ത എതിരാളിയാവും.

ട്രിപ്പിള്‍ ജംപില്‍ ദേശീയ റെക്കോഡുകാരന്‍ തമിഴ്നാടിന്റെ പ്രവീണ്‍ ചിത്രവേലും മലയാളി താരം അബ്ദുള്ള അബൂബക്കറും ഇന്ത്യന്‍ പോരാട്ടം നയിക്കും. ഇരുവരും 17 മീറ്റര്‍ പിന്നിടുന്നവരാണ്. കൊച്ചിയിലെ ഫെഡറേഷന്‍ കപ്പില്‍ ചിത്രവേല്‍ 17.37 മീറ്ററില്‍ തന്റെതന്നെ ദേശീയറെക്കോഡിന് ഒപ്പമെത്തിയിരുന്നു. വനിതാ ലോങ് ജംപില്‍ സഹാലി സിങ്ങും മലയാളിയായ ആന്‍സി സോജനും മെഡല്‍പ്രതീക്ഷകളായിട്ടുള്ളവരാണ്.