പുതിയ തട്ടകത്തിലെത്തിയ പരിശീലകനൊപ്പം അശ്‌റഫ് ഹകീമിയും ഡിസയര്‍ ഡൂവും കൂട്ടരും ചേര്‍ന്നാണ് പി.എസ്.ജിക്ക് കന്നിക്കിരീടത്തിന്റെ ഇരട്ടി മധുരം നല്‍കിയത്. മൂന്നുവട്ടം ചാമ്പ്യന്മാരായ ചരിത്രവുമായെത്തിയ ഇന്റര്‍ മിലാനെ എതിരില്ലാത്ത അഞ്ചു ഗോളുകള്‍ക്കാണ് ടീം ചുരുട്ടിക്കെട്ടിയത്. പാരിസിയന്‍ ക്ലബിനായി ഡിസൈര്‍ ഡുവോ ഇരട്ടഗോളുമായി (20, 63ാം മിനിറ്റുകള്‍) തിളങ്ങി. അഷ്‌റഫ് ഹകീമി (12ാം മിനിറ്റ്), ക്വിച്ച ക്വാരറ്റ്ക്ഷ്‌ലിയ (73), സെന്നി മയൂലു (86) എന്നിവരാണ് പി.എസ്.ജിയുടെ മറ്റു സ്‌കോറര്‍മാര്‍.

മത്സരത്തില്‍ പന്തടക്കത്തിലും ഗോളിലേക്ക് ഷോട്ടുകള്‍ തൊടുക്കുന്നതിലും ആധിപത്യം പുലര്‍ത്തിയത് പി.എസ്.ജി ആയിരുന്നു. ലോക ഫുട്ബാളിലെ വമ്പന്‍താരങ്ങളായ ലയണല്‍ മെസ്സി, നെയ്മര്‍, കിലിയന്‍ എംബാപ്പെ എന്നിവര്‍ ക്ലബിനായി ഒരുമിച്ച് പന്തുതട്ടിയിട്ടും നേടാന്‍ കഴിയാതെ പോയ ചാമ്പ്യന്‍സ് ലീഗ് കിരീടമാണ് ലൂയി എന്റിക്വെയുടെ കീഴില്‍ ഒത്തൊരുമയോടെ കളിച്ച് ടീം നേടിയത്.