സംസ്ഥാന സ്പോര്ട്സ് കൗണ്സില് പ്രസിഡന്റായി ടി പി ദാസന് ചുമതലയേറ്റു; മേഴ്സിക്കുട്ടന് വൈസ് പ്രസിഡന്റ്
വിവാദങ്ങള്ക്ക് വിട. സംസ്ഥാന സ്പോര്ട്സ് കൗണ്സില് പ്രസിഡന്റായി ടി പി ദാസനെ നിയമിച്ച് ഉത്തരവിറങ്ങി. വൈകുന്നേരം അദ്ദേഹം ചുമതലയേറ്റു. ഏറെ വിവാദങ്ങള്ക്കുശേഷം ഒളിമ്പ്യന് അഞ്ജു ബോബി ജോര്ജ് രാജി വച്ചതിന്റെ പശ്ചാത്തലത്തിലാണ് കൗണ്സില് പ്രസിഡന്റ് സ്ഥാനത്തേക്കു ടി പി ദാസന്റെ നിയമനം. മേഴ്സിക്കുട്ടന് വൈസ് പ്രസിഡന്റാകും.
കഴിഞ്ഞ എല്.ഡി.എഫ് സര്ക്കാരിന്റെ കാലത്തും ദാസന് സ്പോര്ട്സ് കൗണ്സില് പ്രസിഡന്റായിരുന്നു. ടി പി ദാസന് തന്നെ പ്രസിഡന്റാകുമെന്നും മേഴ്സിക്കുട്ടന് വൈസ് പ്രസിഡന്റാകുമെന്നും മറുനാടന് മലയാളി നേരത്തെ റിപ്പോര്ട്ട് ചെയ്തിരുന്നു.
കെ സി ലേഖ (ബോക്സിങ്), ജോര്ജ് തോമസ് (ബാഡ്മിന്റണ്), എസ് രാജീവ് (നീന്തല്), എം ആര് രഞ്ജിത് (അമ്പെയ്ത്ത്), ഡി വിജയകുമാര് (കനോയിങ്), ഒ കെ വിനീത് (ബോക്സിങ്), ഐ ടി മനോജ് എന്നിവരാണു മറ്റു സമിതി അംഗങ്ങള്.
കായികമന്ത്രി ഇ പി ജയരാജനുമായുള്ള കൂടിക്കാഴ്ചയ്ക്കുശേഷം മാദ്ധ്യമങ്ങള്ക്കു മുന്നില് പരാതിയുമായി എത്തിയ അഞ്ജു ബോബി ജോര്ജ് ഏറെ വിവാദങ്ങള്ക്കു ശേഷമാണ് രാജിവച്ചത്. വിമാനയാത്രാവിവാദവും മറ്റുമായി വിഷയം ഏറെനാള് വാര്ത്തകളില് നിറഞ്ഞു നിന്നിരുന്നു. സഹോദരനു നിയമനം നല്കിയ സംഭവവും അഞ്ജുവിനെതിരെ വിമര്ശനശരങ്ങള് എയ്തു.
അതിനിടെ, സ്പോര്ട്സ് ലോട്ടറി അടക്കമുള്ള വിഷയങ്ങള് ഉയര്ത്തിക്കാട്ടി അഞ്ജുവും അഴിമതി ആരോപണം ഉന്നയിച്ചിരുന്നു. ടി പി ദാസനെ പ്രതിക്കൂട്ടില് നിര്ത്തുംവിധത്തിലായിരുന്നു അഞ്ജുവിന്റെ ആരോപണങ്ങള്. എന്നാല്, അഞ്ജു രാജിവച്ച ഒഴിവിലേക്ക് ടി പി ദാസനെ തന്നെ നിയമിച്ച് ആരോപണങ്ങള് തള്ളിക്കളയുന്നുവെന്ന സമീപനമാണ് സര്ക്കാര് സ്വീകരിച്ചിരിക്കുന്നത്.
നേരത്തെ മുതല് തന്നെ സ്പോര്ട്സ് കൗണ്സില് അധ്യക്ഷ സ്ഥാനത്തേക്ക് ടി പി ദാസന്റെ പേരാണ് പരിഗണിക്കപ്പെട്ടത്. എന്നാല് അഞ്ജു ബോബി ജോര്ജ്ജ് അഴിമതി ആരോപണങ്ങള് ഉന്നയിച്ചതോടെ അദ്ദേഹക്കെ കൈവിടുമെന്ന പ്രചാരണം ചില കോണുകളില് ഉണ്ടായി. എന്നാല് സ്വന്തം അഴിമതി പുറത്തുവന്നതിലെ ജാള്യം മറയ്ക്കാനുള്ള ശ്രമമായി മാത്രമാണു കായികമന്ത്രി ഇ പി ജയരാജനും മുഖ്യമന്ത്രി പിണറായി വിജയനും ഇതിനെ വിലയിരുത്തിയത്. അഞ്ജുവിന്റെ ആരോപണം വില കല്പ്പിക്കേണ്ടെന്ന നിലപാട് മുഖ്യമന്ത്രി കൈക്കൊണ്ടതോടെ ദാസന് തന്നെ നറുക്കു വീഴുകയായിരുന്നു.
https://www.facebook.com/Malayalivartha
