ലോക അത്‌ലറ്റിക് മീറ്റില്‍ ചരിത്രം കുറിച്ച് ഇന്ത്യന്‍ ജാവലിന്‍ ത്രോ താരം ദാവീന്ദര്‍ സിംഗ്. ലോക ചാമ്പ്യന്‍ഷിപ്പില്‍ ജാവലിന്‍ ത്രോയില്‍ ഫൈനലിലെത്തുന്ന ആദ്യ ഇന്ത്യന്‍ താരമെന്ന റെക്കാഡാണ് ദാവീന്ദര്‍ കുറിച്ചത്. യോഗ്യത റൗണ്ടില്‍ ഗ്രൂപ്പ് ബിയില്‍ മത്സരിച്ച ദാവീന്ദര്‍ തോളിനേറ്റ പരിക്ക് അതിജീവിച്ചാണ് ഫൈനലിലെത്തിയത്. ശനിയാഴ്ച്ചയാണ് ഫൈനല്‍ നടക്കുക.

യോഗ്യത മാര്‍ക്കായ 83 മീറ്റര്‍ അവസാന ശ്രമത്തിലാണ് ഇന്ത്യന്‍ താരം മറികടന്നത്. ആദ്യം 82.22 മീറ്ററും രണ്ടാം തവണ 82.14 മീറ്ററുമാണ് പഞ്ചാബ് താരം പിന്നിട്ടത്. 13 പേര് ഫൈനലില്‍ യോഗ്യത നേടിയപ്പോള്‍ ഇതില്‍ ഏഴാമതായാണ് ദാവീന്ദര്‍ ഫൈനലിലെത്തിയത്. ഭുവനേശ്വറില്‍ നടന്ന ഏഷ്യന്‍ അത്‌ലറ്റിക് ചാമ്പ്യന്‍ഷിപ്പില്‍ 85.23 മീറ്റര്‍ എറിഞ്ഞ് നീരജ് സ്വര്‍ണവും 83.29 മീറ്റര്‍ പിന്നിട്ട ദാവീന്ദര്‍ വെങ്കലവും നേടിയിരുന്നു.

അതേസമയം ഇന്ത്യയുടെ പ്രതീക്ഷയായിരുന്ന നീരജ് ചോപ്ര എല്ലാവരെയും നിരാശപ്പെടുത്തി. യോഗ്യതാ റൗണ്ടില്‍ 82.26 മീറ്ററാണ് നീരജ് പിന്നിട്ടത്. ഗ്രൂപ്പില്‍ ഏഴാം സ്ഥാനത്ത് എത്താനെ നീരജിന് സാധിച്ചുള്ളൂ. 19കാരനായ നീരജ് ലോക ജൂനിയര്‍ റെക്കോഡിനുടമയാണ്. നീരജിന്റെ ഏറ്റവും മികച്ച വ്യക്തിഗത ദൂരം 86.48 മീറ്ററും സീസണിലെ മികച്ച ദൂരം 85.63 മീറ്ററുമാണ്.