നെയില്‍പോളിഷ് റിമൂവറിന്റെ ജാലവിദ്യ
നഖത്തിലിടുന്ന നെയില്‍ പോളിഷ് മായിച്ചുകളയുക എന്നതു മാത്രമല്ല, വൃത്തിയാക്കലിന്റെ മറ്റു ചെപ്പടിവിദ്യകള്‍ കുറേ നെയില്‍ പോളിഷിന്റെ കയ്യിലുമുണ്ട്.
സൂപ്പര്‍ ഗ്ലൂ എടുക്കുമ്പോള്‍ വിരലിലൊട്ടുക പതിവാണ്. ഈ പശ കയ്യില്‍ നിന്നു കളയാന്‍ ഒരു കഷണം പഞ്ഞിയില്‍ അല്‍പം റിമൂവര്‍ മുക്കി വിരലുകളില്‍ ഉരസുക. വേദനയില്ലാതെ പശ ഇളക്കി കളയാം.
കാറിന്റെ ഗ്ലാസിലും കണ്ണാടിയിലും സ്റ്റിക്കര്‍ ഒട്ടിച്ചതിന്റെ പാടു വീഴുന്നത് അഭംഗിയാണ്. അതു മാറ്റാന്‍ സ്റ്റിക്കര്‍ മുഴുവനായി ഇളക്കി കളഞ്ഞ ശേഷം റിമൂവര്‍ പഞ്ഞിയില്‍ മുക്കി പശയുള്ള ഭാഗത്ത് അമര്‍ത്തി തിരുമ്മുക. പാടുകള്‍ അവശേഷിപ്പിക്കാതെ കറമാറും.
കംപ്യൂട്ടര്‍ കീബോര്‍ഡു വൃത്തിയാക്കാന്‍ ഏറ്റവും നല്ല മാര്‍ഗം റിമൂവര്‍ തന്നെ. പഞ്ഞിയില്‍ റിമൂവര്‍ മുക്കി ഓരോ കീയും തുടച്ചു വൃത്തിയാക്കാം.
വിനൈല്‍ ഫ്‌ളോറിങ് ചെയ്ത തറയിലെ പാടുകള്‍ നീക്കാന്‍ നെയില്‍ പോളിഷ് റിമൂവര്‍ ഉപയോഗിക്കാം. ആദ്യം കുറച്ച് ഭാഗത്ത് ചെയ്തു നോക്കി കുഴപ്പമില്ലെന്നു ഉറപ്പിച്ചിട്ടു വേണം ഇതു മുഴുവന്‍ തറയിലും ചെയ്യാന്‍.
ചൈനാപാത്രങ്ങളിലെ കറകള്‍ കളയാന്‍ റിമൂവറിനു സാധിക്കും. റിമൂവറില്‍ പഞ്ഞി മുക്കി കറയുള്ള ഭാഗത്ത് അമര്‍ത്തി തിരുമ്മുക.
സ്വിച്ച് ബോര്‍ഡിന്റെ മഞ്ഞനിറം മാറ്റാനും അഴുക്കുകളയാനും റിമൂവര്‍ കൊണ്ടു തുടച്ചാല്‍ മതി.
പെര്‍മനെന്റ് മാര്‍ക്കറിന്റെ പാടുകള്‍ കയ്യില്‍ നി്ന്നും മതിലില്‍ നിന്നും കളയാന്‍ പഞ്ഞിയില്‍ നെയില്‍ പോളീഷ് മുക്കി അതുകൊണ്ടു തുടയ്ക്കുക.
പ്ലാസ്റ്റിക്ക് വാച്ചില്‍ ഉണ്ടാകുന്ന ചെറിയ പോറലുകള്‍ കളയാന്‍ റിമൂവറില്‍ പഞ്ഞി മുക്കി തുടയ്ക്കാം. റിമൂവറിലുള്ള അസറ്റോണിനു പ്ലാസ്റ്റിക്കിനെ മയപ്പെടുത്താന്‍ കഴിയും. അധികം അമര്‍ത്തി തുടയ്ക്കാതിരിക്കാന്‍ പ്രത്യേകം ശ്രദ്ധിക്കണം. പ്ലാസ്റ്റിക്കില്‍ തുളകള്‍ വീഴാന്‍ സാധ്യതയുണ്ട്.
റേസറുകള്‍ അണുവിമുക്തമാക്കാനും ബ്ലേഡിനിടയിലിരിക്കുന്ന അഴുക്കു നീക്കാനും അവ റിമൂവറില്‍ മുക്കി വച്ചാല്‍ മതി. റേസര്‍ ഈടു നില്‍ക്കാനും ഇതു സഹായിക്കും.
https://www.facebook.com/Malayalivartha
