വളരെ പോഷ് ആയ ഹോട്ടലിൽ ഒരു രാത്രി അന്തിയുറങ്ങാൻ എത്ര രൂപ വേണ്ടിവരും? എത്ര വലിയ സ്റ്റാർ ഹോട്ടലായാലും കണക്ക് ആയിരങ്ങളിൽ നിൽക്കും. എന്നാൽ ഇറ്റലിയിലെ മിലാനിലുള്ള ഇക്‌സെൽസീർ ഹോട്ടൽ ഗാലിയയിൽ ആണ് ഒരു ദിവസം താമസിക്കുന്നതെങ്കിൽ ചെലവ് എത്രയാണെന്ന് ഊഹിക്കാമോ? 14 ലക്ഷം രൂപ!

ഇത്രയധികം വാടക ഈടാക്കാൻ എന്ത് പ്രത്യേകതയാണ് ഈ ഹോട്ടലിനുള്ളതെന്ന അങ്കലാപ്പിലാണോ നിങ്ങൾ?
തികച്ചും സ്വകാര്യത ഉറപ്പുതരുന്ന ഈ ഹോട്ടലിൽ ആവശ്യമുള്ള സന്ദർശകർക്ക് ലക്ഷ്വറി സ്യൂട്ടിൽ സ്വകാര്യ ലിഫ്റ്റ് സൗകര്യം വരെയുണ്ട് . നാല് മുറികൾ ഉള്ള ഒരു സ്യൂട്ടിൽ സ്വകാര്യ മട്ടുപ്പാവ്, സ്വകാര്യ സ്പാ,ടർക്കിഷ് ബാത്ത് എന്നിവയെല്ലാം ഒരുക്കിയിട്ടുണ്ട്.ലക്ഷ്വറി സ്യൂട്ടായ കത്താറ സ്യൂട്ടിലെ ജാലകങ്ങൾ എല്ലാം ബുള്ളറ്റ് പ്രൂഫാണ്.

ഇന്റീരിയർ ഡിസൈൻ ഇറ്റാലിയൻ ശൈലിയുടെ മാസ്മരിക സൗന്ദര്യം നിറഞ്ഞു നിൽക്കുന്നവയാണ്.

മീറ്റിംഗുകൾ നടത്താനുള്ള കോൺഫറൻസ് മുറി,10 പേർക്ക് ഒരുമിച്ചിരുന്നു ഭക്ഷണം കഴിക്കാവുന്ന തീൻമേശ എന്നി സൗകര്യങ്ങളും ഹോട്ടലിലുണ്ട്. സ്യൂട്ട് പാക്കേജുകൾ ഉൾപ്പെടെ 24 മണിക്കൂറും സേവനം ലഭ്യമാണ്. സ്യൂട്ടുകളിൽ രണ്ട് മട്ടുപ്പാവുകളും ഡൈനിങ്ങ് ഏരിയയും ഒരുക്കിയിട്ടുണ്ട്.

ലോക ട്രാവൽ അവാർഡിന്റെ ഈ വർഷത്തെ ഏറ്റവും മികച്ച ഹോട്ടൽ വിഭാഗത്തിനുള്ള അവാർഡ് നേടിയത് ഈ ഹോട്ടലിനാണ്. തുടർച്ചയായ രണ്ടാം തവണയാണ് ലോകത്തിലെ മികച്ച ഹോട്ടലിനുള്ള പുരസ്‌കാരം ഹോട്ടൽ കരസ്ഥമാക്കുന്നത്.

ഹോട്ടലിലെ ഏറ്റവും ഉയർന്ന സ്യൂട്ടായ ഗ്രാൻഡ് ലക്ഷ്വറി സ്യൂട്ടിൽ ആണ് ഒരു ദിവസത്തിന് 14 ലക്ഷം ഈടാക്കുന്നത്. ഇവിടുത്തെ സാധാരണ മുറിക്കു ഒരു ദിവസത്തെ വാടക 17,000 ആണ്.

ആഥിത്യമര്യാദക്കും ഹോട്ടൽ മുൻപന്തിയിൽ തന്നെയാണ്. രൂപ 14 ലക്ഷം പോയാൽ എന്താ , ജീവിതത്തിൽ എന്നെന്നും ഓർക്കാനുള്ള ഒന്നായിരിക്കും ഈ രാജകീയ ഹോട്ടലിലെ താമസം .