യുദ്ധം അവസാനിപ്പിക്കാൻ യുഎസ് പ്രസിഡന്റ് ഡോണൾഡ് ട്രംപിന്റെ ‘അവസാന സന്ദേശവുമായി’ എത്തിയ പാക്കിസ്ഥാൻ സംയുക്ത സൈനിക മേധാവി അസിം മുനീറിനെ ഇറാൻ നാണംകെടുത്തിയെന്ന് റിപ്പോർട്ട്. ‘വിമാനത്തിലേക്ക് തിരികെ പോകാൻ’ വരെ അസിം മുനീറിനോട് ഇറാന്റെ പുതിയ സുരക്ഷാ കൗൺസിൽ മേധാവി മൊഹ്സെൻ റെസായി ആവശ്യപ്പെട്ടതായി ലബനീസ് പത്രമായ അൽ അഖ്ബർ റിപ്പോർട്ടു ചെയ്തു.

ഇറാന്റെ ആണവ പദ്ധതി പൂർണമായും ഉപേക്ഷിക്കണമെന്ന ട്രംപിന്റെ അന്ത്യശാസനം അറിയിക്കാനാണ് മുനീർ ടെഹ്റാനിലെത്തിയത്. ആണവ പദ്ധതിയുമായി ബന്ധപ്പെട്ട ചർച്ചകളിൽ ഇറാൻ വഴങ്ങാൻ തയ്യാറാകണമെന്ന് അസിം മുനീർ റെസായിയെ അറിയിച്ചതായി ഇറാൻ ഇന്റർനാഷണൽ റിപ്പോർട്ട് ചെയ്തു. എന്നാൽ ഇറാന്റെ ഏഴ് നിബന്ധനകൾ യുഎസ് അംഗീകരിക്കണമെന്നായിരുന്നു ഇറാന്റെ പ്രതികരണം.

അസിം മുനീറിന് ഇറാനിൽ ലഭിച്ചത് തണുത്ത സ്വീകരണമാണെന്ന് സിഎൻഎൻ–ന്യൂസ് 18നും റിപ്പോർട്ട് ചെയ്തു. റെസായിയുടെയും മുനീറിന്റെ ശാരീരികഭാഷ വിശകലനം ചെയ്തുകൊണ്ടായിരുന്നു റിപ്പോർട്ട്. കൂടിക്കാഴ്ചയിൽ റെസായിക്കു കൈകൊടുക്കുമ്പോൾ അസിം മുനീർ മുന്നോട്ടാഞ്ഞ് ആലിംഗനത്തിന് ശ്രമിക്കുന്നുണ്ടെങ്കിലും റെസായി നിവർന്ന് നേരെ നിൽക്കുന്നതും തിരികെ ആലിംഗനം ചെയ്യാത്തതിന്റെയും വിഡിയോകൾ പുറത്തുവന്നു. മുനീറിന് റെസായി അധികനേരം ഹസ്തദാനം നൽകുന്നതുമില്ല. ഇതിനു പിന്നാലെയാണ് മുനീറിന് അവഗണന നേരിട്ടെന്ന റിപ്പോർട്ടുകൾ പ്രചരിക്കുന്നത്.