ഹോണ്ട മോട്ടോർസൈക്കിൾ ആൻഡ് സ്‌കൂട്ടർ ഇന്ത്യ (എച്ച്എംഎസ്‌ഐ) പുതിയ എക്‌സ്ആർ300 എൽ, എക്‌സ്ആർ300 റാലി മോട്ടോർസൈക്കിളുകളുടെ വില പ്രഖ്യാപിച്ചു. എക്‌സ്ആർ300 എൽ-ന് 1.83 ലക്ഷം രൂപയും, എക്‌സ്ആർ300 റാലി 2.08 ലക്ഷം രൂപയുമാണ് വില (ബെംഗളൂരു എക്‌സ്-ഷോറൂം). വില ഒക്ടോബർ 5 മുതൽ പ്രാബല്യത്തിൽ വന്നു. രണ്ട് മോഡലുകളുടെയും ബുക്കിംഗ് രാജ്യവ്യാപകമായി ആരംഭിച്ചു.

അംഗീകൃത ഹോണ്ട ബിഗ്‌വിംഗ് ഡീലർഷിപ്പുകൾ വഴിയാണ് ഇരു മോഡലുകളും ലഭ്യമാകുക. 5,000 രൂപ നൽകി ബുക്കിംഗ് നടത്താം. 293.5 സിസി എയർ-കൂൾഡ് എൻജിൻ, ഹോണ്ട സെലക്ടബിൾ ടോർക്ക് കൺട്രോൾ, പ്രോ-ലിങ്ക് റിയർ സസ്‌പെൻഷൻ, മുന്നിലും പിന്നിലും ഡിസ്‌ക് ബ്രേക്കുകൾ, സ്വിച്ചബിൾ ഡ്യുവൽ-ചാനൽ എബിഎസ്, അസിസ്റ്റ് സ്ലിപ്പർ ക്ലച്ച് എന്നിവയാണ് പ്രധാന സവിശേഷതകൾ.

റാലി ശൈലിയിലുള്ള ഡിസൈനിനൊപ്പം ദീർഘദൂര യാത്രകൾക്ക് അനുയോജ്യമായ സൗകര്യങ്ങളും വിൻഡ് പ്രൊട്ടക്ഷനും എക്‌സ്ആർ300 റാലി നൽകുന്നു. എക്‌സ്ആർ300 എൽ ദൈനംദിന യാത്രകൾക്കൊപ്പം ചെളി, മണൽ, ചരൽ, പാറക്കെട്ടുകൾ തുടങ്ങിയ ഓഫ്-റോഡ് സാഹചര്യങ്ങളിലും ഉപയോഗിക്കാനായി രൂപകൽപ്പന ചെയ്‌തതാണ്. എക്‌സ്ആർ300 എൽ എക്‌സ്ട്രീം റെഡ്, ഷാസ്റ്റ വൈറ്റ് നിറങ്ങളിലും എക്‌സ്ആർ300 റാലി എക്‌സ്ട്രീം റെഡ്, ട്രൂ ബ്ലാക്ക് നിറങ്ങളിലും ലഭ്യമാകും.