നികുതി വെട്ടിപ്പ് തടയാന്‍ ഉപഭോക്താക്കള്‍ക്ക് പ്രത്യേക നമ്പര്‍ നല്‍കാന്‍ സമിതിയുടെ ശുപാര്‍ശ
ചരക്ക് സേവന നികുതിയുമായി ബന്ധപ്പെട്ട ഇടപാടുകളിലെ വെട്ടിപ്പ് തടയുകയെന്ന ലക്ഷ്യവുമായി ജിഎസ്ടി കൗണ്‍സില്‍ നിയമിച്ച സമിതി രാജ്യത്തെ ഓരോ പൗരന്മാര്‍ക്കും പ്രത്യേക ഉപഭോക്തൃനമ്പര്‍ നല്‍കാന്‍ കൗണ്‍സിലിന് ശുപാര്‍ശ നല്‍കി.
ഇതിലൂടെ ഉപഭോക്താവില്‍ നിന്നും ഈടാക്കുന്ന നികുതിപ്പണം കൃത്യമായി സര്‍ക്കാരിന് കൈമാറിയോയെന്ന് ഇടപാടുകാരന് പരിശോധിക്കാന്‍ സംവിധാനമുണ്ടാകും. ഇതിലൂടെ സര്‍ക്കാരിന് നികുതി വെട്ടിപ്പ് വന്‍തോതില്‍ നിയന്ത്രിക്കാന്‍ കഴിയും. കാലക്രമേണ ഉപഭോക്തൃനമ്പര്‍ ബില്ലില്‍ രേഖപ്പെടുത്തിയുളള ഇടപാട് പ്രോത്സാഹിപ്പിക്കണമെന്നും ഇത്തരം ഉപഭോക്താക്കള്‍ക്ക് പ്രത്യേക ആനുകൂല്യങ്ങള്‍ നല്‍കണമെന്നും ജിഎസ്ടി കൗണ്‍സിലിന് നല്‍കിയ ശുപാര്‍ശയില്‍ പറയുന്നു.
സര്‍ക്കാരിന് നികുതി കൈമാറിയില്ലെങ്കില്‍ വ്യാപാരിയെ ശിക്ഷിക്കാനും ഉപഭോക്താവിന് നികുതിത്തുക പാരതോഷികമായി നല്‍കാനും നിര്‍ദ്ദേശമുണ്ട്. പുതിയ രീതിയില്‍ ജി എസ്ടി നടപ്പാക്കിയാല്‍ വരുമാനത്തില്‍ 30 ശതമാനത്തിന്റെ വര്‍ദ്ധനയുണ്ടാവുമെന്നും ശുപാര്‍ശയില്‍ പറയുന്നു. വ്യാപാരികളും ഉപഭോക്താക്കളും തമ്മില്‍ നടത്തുന്ന ഇടപാടിലൂടെ നികുതി വെട്ടിപ്പിന്റെ രൂപത്തില്‍ സര്‍ക്കാരിന് നഷ്ടമാവുന്നത് മാസം 30,000 കോടി രൂപയോളമാണ്.
https://www.facebook.com/Malayalivartha
