പാചകവാതക സിലിണ്ടറുകളുടെ വില കൂട്ടി. സിലിണ്ടറിന്‌ ഏഴ്‌ രൂപയാണു വര്‍ധിപ്പിച്ചത്‌. പെട്രോള്‍, ഡീസല്‍ വില കുത്തനെ കൂട്ടിയതിനു പിന്നാലെയാണ്‌ ഈ വര്‍ധന. ഇതോടെ 14.2 കിലോ ഗ്രാം ഭാരമുള്ള സിലിണ്ടറിന്‌ വില ഡല്‍ഹിയില്‍ 487 രൂപയായി.

2018 മാര്‍ച്ചോടെ സബ്‌സിഡി ഇല്ലാതാക്കുമെന്നും അതുവരെ ഓരോ മാസവും സിലിണ്ടറിനു നാലു രൂപ വര്‍ധിപ്പിക്കുമെന്നും പെട്രോളിയം വകുപ്പ്‌ മന്ത്രി ധര്‍മേന്ദ്ര പ്രധാന്‍ നേരത്തെ ലോക്‌സഭയെ അറിയിച്ചിരുന്നു. അടുത്ത മാർച്ച്​ മാസത്തിന്​ മുമ്പായി സബ്​സിഡി ഇല്ലാതാക്കാനാണ്​ കേന്ദ്രസർക്കാരിന്റെ നീക്കം. 2016 ജൂലൈയില്‍ 419 രൂപയായിരുന്ന സിലിണ്ടറിന്റെ വിലയില്‍ ഇതുവരെ 68 രൂപയുടെ വര്‍ധനയാണുണ്ടായത്‌.

ഇതുപ്രകാരം ആഗസ്​റ്റ്​-1ന്​ 2.31 രൂപ മാത്രമേ വർധിപ്പിച്ചിരുന്നുള്ളുവെന്നും ഇത്​ ബാലൻസ്​ ചെയ്യാനാണ്​ ഇക്കുറി ഏഴ്​ രൂപ കൂട്ടിയെതെന്നുമാണ്​ പെട്രോളിയം കമ്പനി വൃത്തങ്ങൾ നൽകുന്ന സൂചന​.