സംസ്ഥാനം കൂടുതല് കടക്കെണിയിലേക്ക് നീങ്ങുന്നു, മാര്ച്ചോടെ കടം 2,10,789 കോടിയാകും
ജനങ്ങളില് നിന്നും നികുതിപിരിച്ചിട്ടും സംസ്ഥാന സര്ക്കാര് കൂടുതല് കടക്കെണിയിലേക്ക്. ചരക്ക് സേവന നികുതി പിഴവുകള് തീര്ത്ത് നടപ്പാക്കുമ്പോള് 25 ശതമാനം വരെ വരുമാന വര്ധന സംസ്ഥാനം പ്രതീക്ഷിക്കുന്നുണ്ട്. രജിസ്ട്രേഷന് അടക്കം പുതിയ ബജറ്റ് നിര്ദേശങ്ങളിലൂടെ വന് സാമ്പത്തിക ബാധ്യത അടിച്ചേല്പ്പിക്കുകയും ചെയ്തു.
എന്നിട്ടും വരും വര്ഷങ്ങളിലും വന്തോതില് കടമെടുക്കാനാണ് തീരുമാനം. അടുത്ത മൂന്നുവര്ഷം 82,285 കോടിയാണ് പൊതുവിപണിയില്നിന്ന് കടമെടുക്കാന് തീരുമാനിച്ചത്. ഇതോടെ സംസ്ഥാനത്തിന്റെ പൊതുകടം 202021 ആകുമ്പോള് മൂന്നു ലക്ഷം കോടിക്ക് അടുത്താകും. ഇത് പലിശ ബാധ്യതയും കുത്തനെ ഉയര്ത്തും. കിഫ്ബി വഴി കടമെടുക്കുന്നത് ഇതിന് പുറമെയാണ്.
ഇക്കൊല്ലം മാര്ച്ചോടെ സംസ്ഥാനത്തിന്റെ കടം 2,10,789 കോടിയാകും. ഇത് 2021 ആകുേമ്പാള് 2,93,074 കോടിയായി ഉയരുമെന്ന് സര്ക്കാറിന്റെ മധ്യകാല സാമ്പത്തികാവലോകനം പറയുന്നു. വാങ്ങിക്കൂട്ടിയ കടത്തിന് കൊടുക്കുന്ന പലിശ ഖജനാവ് ചോര്ത്തുകയാണ്.
കേരളം പ്രതിവര്ഷം 13,526 കോടിയാണ് പലിശ കൊടുക്കുന്നത്. ഇത് മൂന്നുവര്ഷം കൊണ്ട് ഉയര്ന്ന് 20,731 കോടിയിലെത്തും. വാര്ഷിക പലിശബാധ്യതയില് 7205 കോടി കൂടി വര്ധിക്കും. വാര്ഷിക പദ്ധതിക്ക് പണമില്ലാത്തപ്പോഴും പലിശപ്പണം കൊടുക്കാതിരിക്കാന് സര്ക്കാറിന് കഴിയില്ല.
പലിശപ്പണം നല്കാനും എടുത്ത കടം മടക്കിനല്കാനും പോലും കടം വാങ്ങുന്ന സ്ഥിതിയാണ്. കടംവാങ്ങല് തടസ്സപ്പെട്ട കഴിഞ്ഞ ഡിസംബറില് ട്രഷറി ഇടപാടുകള് പൂര്ണമായി മുടങ്ങിയിരുന്നു. അടുത്ത മൂന്നുവര്ഷത്തില് വരുമാനം വന്തോതില് ഉയരുമെന്നാണ് പ്രതീക്ഷിക്കുന്നത്. മൂന്നുവര്ഷം കഴിയുമ്പോള് പ്രതിവര്ഷ വരുമാനവര്ധന മാത്രം 56,940 കോടി ഉണ്ടാകും. നികുതിയേതര വരുമാനത്തില് വര്ഷം 8821 കോടിയുടെ വര്ധന 2021ല് വരും. എന്നാല്, ചെലവ് അതിനെക്കാള് കൂടുതല് വരും. വര്ധിച്ച വരുമാനം തികയാതെ വന്തോതില് കടം വാങ്ങേണ്ടിവരുമെന്നാണ് കണക്കുകള് വ്യക്തമാക്കുന്നത്.
https://www.facebook.com/Malayalivartha