സംസ്ഥാന ബജറ്റിലൂടെ നിരക്കുയരാന്‍ പോകുന്നത് മരണസര്‍ട്ടിഫിക്കറ്റിനു വരെ
സംസ്ഥാന ബജറ്റിലൂടെ നിരക്കുയരാന്‍ പോകുന്നത് മരണ സര്‍ട്ടിഫിക്കറ്റിനുവരെ. ജനങ്ങള്‍ക്ക് സര്‍ക്കാര്‍ നല്‍കുന്ന സേവനങ്ങള്‍ക്കുള്ള എല്ലാ ഫീസുകളും നിരക്കുകളും അഞ്ച് ശതമാനം ഉയര്‍ത്തുന്നതോടെ അപേക്ഷകള്‍ക്കും സര്‍ട്ടിഫിക്കറ്റുകള്‍ക്കും നിരക്ക് വര്‍ധിക്കുമെന്നാണ് വിലയിരുത്തല്‍. ക്ഷേമമെന്ന് സര്‍ക്കാര്‍ അവകാശപ്പെടുമ്പോഴും സേവനനിരക്ക് വര്‍ധിപ്പിച്ചതും ന്യായവില ഉയര്‍ത്തിയതും മുദ്രവില പരിഷ്‌കരിച്ചതും ജനങ്ങള്‍ക്ക് ഇരുട്ടടിയാണ്. ചില വകുപ്പുകളില്‍ സേവനങ്ങള്‍ക്ക് 18 ശതമാനം ജി.എസ്.ടിയുണ്ട്. ഇതിന് പുറമേയാണ് അഞ്ചുശതമാനം കൂടി സേവനനിരക്ക് ഉയരുന്നത്. ആശുപത്രികളിലെ ഒ.പി ടിക്കറ്റിനുവരെ നിരക്ക് വര്‍ധന ഉണ്ടാകും.
തദ്ദേശസ്ഥാപനങ്ങള്‍, വില്ലേജ്, താലൂക്ക്, സബ്‌രജിസ്ട്രാര്‍ ഓഫിസുകള്‍, പൊലീസ് സ്‌റ്റേഷനുകള്‍ തുടങ്ങി സര്‍ക്കാര്‍ സേവനങ്ങള്‍ ലഭ്യമാക്കുന്ന എല്ലായിടങ്ങളില്‍നിന്നും പൊതുജനങ്ങള്‍ക്ക് ലഭിക്കേണ്ട സര്‍ട്ടിഫിക്കറ്റുകള്‍ക്കും അപേക്ഷകള്‍ക്കുമാണ് നിരക്കുവര്‍ധന വരുന്നത്.
ജനനമരണ സര്‍ട്ടിഫിക്കറ്റ്, ജാതി സര്‍ട്ടിഫിക്കറ്റ്, വിവാഹ സര്‍ട്ടിഫിക്കറ്റ്, വരുമാന സര്‍ട്ടിഫിക്കറ്റ്, വാസസ്ഥല സര്‍ട്ടിഫിക്കറ്റ്, വീടുകള്‍ക്കും കടകള്‍ക്കുമുള്ള വൈദ്യുതി കണക്ഷന്‍, ജലവിതരണ കണക്ഷന്‍ എന്നിവക്ക് വര്‍ധനവ് ബാധകമാണ്. റേഷന്‍ കാര്‍ഡ് നല്‍കല്‍, പൊലീസ് സ്‌റ്റേഷനില്‍ നല്‍കുന്ന പരാതിക്ക് രസീത്, എഫ്.ഐ.ആര്‍ പകര്‍പ്പ് നല്‍കല്‍, സമയബന്ധിതമായ പാസ്‌പോര്‍ട്ട് വെരിഫിക്കേഷന്‍, സമയബന്ധിതമായ ജോലി വെരിഫിക്കേഷന്‍, വാല്യുവേഷന്‍ സര്‍ട്ടിഫിക്കറ്റ്, പൊസഷന്‍, തിരിച്ചറിയല്‍ സര്‍ട്ടിഫിക്കറ്റ്, വിധവ സര്‍ട്ടിഫിക്കറ്റ് എന്നിവക്കും നിരക്കുയരും.
വണ്‍ ആന്‍ഡ് സെയിം സര്‍ട്ടിഫിക്കറ്റ്, ആശ്രിത സര്‍ട്ടിഫിക്കറ്റ്, അനന്തരാവകാശ സര്‍ട്ടിഫിക്കറ്റ്, ലൈഫ് സര്‍ട്ടിഫിക്കറ്റ്, ബാധ്യത സര്‍ട്ടിഫിക്കറ്റ്, ബി.ടി.ആര്‍, നോണ്‍ റീ മേര്യേജ് സര്‍ട്ടിഫിക്കറ്റ്, സോള്‍വന്‍സി സര്‍ട്ടിഫിക്കറ്റ് തുടങ്ങിയവക്കും നിരക്കുവര്‍ധനവ് ബാധകമാണ്.
വില്ലേജ് ഓഫിസുകള്‍ വഴി നല്‍കുന്ന സര്‍ട്ടിഫിക്കറ്റുകള്‍ സൗജന്യമാണെങ്കിലും അപേക്ഷ ഫീസില്‍ വര്‍ധനവുണ്ടാകും. സര്‍ട്ടിഫിക്കറ്റിനായി അപേക്ഷ നല്‍കുമ്പോള്‍ പതിക്കുന്ന സ്റ്റാമ്പിന്റെ നിരക്കും ഉയരും. കോര്‍ട്ടുഫീ സ്റ്റാമ്പിന്റെ നിരക്കും ഉയര്‍ന്നാല്‍ അത് കടുപ്പമേറും. അങ്ങനെയെങ്കില്‍ അപേക്ഷക്കും സര്‍ട്ടിഫിക്കറ്റിനും അഞ്ച് ശതമാനം വെച്ച് നിരക്ക് കൂടുതല്‍ നല്‍കേണ്ടിവരും.
ഇതോടെ രജിസ്‌ട്രേഷന്‍ വകുപ്പുമായി ബന്ധപ്പെട്ട സേവനങ്ങള്‍ ജനങ്ങള്‍ ബാധ്യതയാകും. പകര്‍പ്പ്, ബാധ്യത സര്‍ട്ടിഫിക്കറ്റ്, മുക്ത്യാര്‍, വില്‍പത്രം എന്നിവക്ക് 35-40 രൂപ വരെ നിരക്ക് വര്‍ധന ഉണ്ടാക്കും. കൂടാതെ പേപ്പറിനും മറ്റുമായി രജിസ്‌ട്രേഷന്‍ വകുപ്പില്‍ ഇപ്പോള്‍ 18 ശതമാനം ജി.എസ്.ടി ഈടാക്കുന്നുണ്ട്. ജി.എസ്.ടി കൂടാതെ അഞ്ചുശതമാനം സേവന നിരക്കും നല്‍കേണ്ടിവരുക എന്നത് ജനങ്ങള്‍ക്ക് ഇരുട്ടടി തന്നെയാണ്.
https://www.facebook.com/Malayalivartha
