ബജറ്റില് ആശ്വാസ പ്രഖ്യാനപനങ്ങളൊന്നുമില്ലാത്തതിനെ തുടര്ന്ന് കുരുമുളക് കര്ഷകര് ദുരിതത്തില്
പ്രതീക്ഷയോടെ കാത്തിരുന്ന കേന്ദ്ര ബജറ്റില് ആശ്വാസ പ്രഖ്യാപനങ്ങളൊന്നും ഇല്ലാത്തതിനെ തുടര്ന്ന് കുരുമുളക് കര്ഷകരുടെ അവസ്ഥ കൂടുതല് വഷളായി. ഇറക്കുമതി നിയന്ത്രണാതീതമായി തുടരുകയും വില കുത്തനെ ഇടിയുകയും ചെയ്തത് കുരുമുളക് കര്ഷകരെ നട്ടംതിരിക്കുകയാണ്. കിലോയ്ക്ക് 700 രൂപയ്ക്ക് മുകളില് ഉണ്ടായിരുന്ന വില ഇപ്പോള് 400 രൂപയിലേക്ക് കൂപ്പുകുത്തി. കഴിഞ്ഞ ഒരു വര്ഷത്തിനിടെ മാത്രമുണ്ടായ വിലത്തകര്ച്ച 35 ശതമാനമാണ്.
വ്യവസായികള് നിലവാരം തീരെക്കുറഞ്ഞ വിയറ്റ്നാം കുരുമുളക് 20,000 ടണ്ണിലേറെ ഇറക്കുമതി ചെയ്ത് സംഭരിച്ചിട്ടുണ്ടെന്നാണ് വിലയിരുത്തല്. ഇവ കൂട്ടത്തോടെ വിപണിയില് എത്തിയാല് മികച്ച നിലവാരമുള്ള ഇന്ത്യന് കുരുമുളകിന്റെ വില വീണ്ടും തകര്ന്നടിയും. ഇറക്കുമതി നിയന്ത്രിക്കാതെ നിലവിലെ പ്രതിസന്ധി മാറില്ലെന്ന് കര്ഷകര് പറയുന്നു. ആഗോളതലത്തില് കുരുമുളക് ഉപഭോഗം ഏറ്റവും കൂടിയ രാജ്യങ്ങളിലൊന്നാണ് ഇന്ത്യ. ഇറക്കുമതി കൂടാനും ഇതാണ് കാരണം.
വിയറ്റ്നാമില് നിന്നുള്ള നിലവാരമില്ലാത്ത കുരുമുളകാണ് ശ്രീലങ്ക വഴി ഇന്ത്യയിലേക്ക് വന്തോതില് ഇറക്കുമതി ചെയ്യുന്നത്. ഇതിന്, കര്ശന നിയന്ത്രണം ഏര്പ്പെടുത്തിയാല് വില മെച്ചപ്പെടുമെന്നാണ് കര്ഷകരുടെ പക്ഷം.
അതേസമയം, കഴിഞ്ഞവാരം ഡോളറിനെതിരെ രൂപയുടെ മൂല്യത്തിലുണ്ടായ ചാഞ്ചാട്ടം കേരള കുരുമുളകിന് നേരിയ ആശ്വാസം പകര്ന്നിട്ടുണ്ട്. അന്താരാഷ്ട്ര മാര്ക്കറ്റില് കേരള മുളകിന് ഇതോടെ വില കയറി. ക്വിന്റലിന് 1,100 രൂപ വര്ദ്ധിച്ച് വില 41,800 രൂപയായി. ഗാര്ബിള്ഡ് വില 42,700 രൂപയില് നിന്ന് 43,800 രൂപയിലേക്കും ഉയര്ന്നു.
https://www.facebook.com/Malayalivartha