ദേശീയ റബര് നയം: ഞായറാഴ്ച കേന്ദ്ര സഹമന്ത്രി അല്ഫോന്സ് കണ്ണന്താനം കര്ഷക, വ്യാപാരി പ്രതിനിധികളുമായി നടത്തുന്ന ചര്ച്ചക്ക് മുന്നോടിയായി ഇന്ന് ഉന്നതലയോഗം
ദേശീയ റബര് നയവുമായി ബന്ധപ്പെട്ട് റബര് ബോര്ഡില് ശനിയാഴ്ച ഉന്നതതല യോഗം നടക്കും. ഞായറാഴ്ച കേന്ദ്ര സഹമന്ത്രി അല്ഫോന്സ് കണ്ണന്താനം കര്ഷക, വ്യാപാരി പ്രതിനിധികളുമായി നടത്തുന്ന ചര്ച്ചക്ക് മുന്നോടിയായാണ് യോഗം. നയത്തില് ഉള്പ്പെടുത്തേണ്ട വിഷയങ്ങള് ചര്ച്ച ചെയ്യാനും ഞായറാഴ്ചത്തെ യോഗത്തില് സമര്പ്പിക്കേണ്ട നിര്ദേശങ്ങള് രൂപപ്പെടുത്താനുമായാണ് പ്ലാന്േറഷന് ഡയറക്ടര് അനിത കരണിന്റെ അധ്യക്ഷതയില് ബോര്ഡിലെ ഉന്നത ഉദ്യോഗസ്ഥര് യോഗം ചേരുന്നത്.
റബര് ബോര്ഡ് ചെയര്മാന് ഡോ. എം.കെ. ഷണ്മുഖസുന്ദരം, പ്ലാന്േറഷന് ജോയന്റ് ഡയറക്ടര് സന്തോഷ് കുമാര് സാരംഗി, ബോര്ഡിലെ സീനിയര് ഉദ്യോഗസ്ഥരും വകുപ്പുതലവന്മാരും പങ്കെടുക്കും. ഏറെ മാസങ്ങള്ക്കുശേഷമാണ് ഇത്തരത്തിലൊരു േയാഗം ചേരുന്നത്. മൂന്നുമാസം മുമ്പ് ചെയര്മാനായി ചുമതലയേറ്റ ഡോ.എം.കെ. ഷണ്മുഖസുന്ദരം ഒരുതവണ മാത്രമാണ് ബോര്ഡ് ആസ്ഥാനത്തേക്ക് എത്തിയത്. അന്ന് പുതിയ നിര്ദേശങ്ങളൊന്നും മുന്നോട്ടുവെക്കാതെ മടങ്ങിയത് ഏറെ പ്രതിഷേധങ്ങള്ക്കും ഇടയാക്കിയിരുന്നു.
ഞായറാഴ്ച രാവിലെ 10.30ന് പുതുപ്പള്ളിയിലെ റബര് റിസര്ച് ഇന്സ്റ്റിറ്റിയൂട്ടിലാണ് മന്ത്രി അല്ഫോന്സ് കണ്ണന്താനം വിളിച്ചുചേര്ത്ത യോഗം. കര്ഷക പ്രതിനിധികള്, വ്യാപാര, വ്യവസായ മേഖലകളിലെ പ്രതിനിധികള് തുടങ്ങിയവരാകും പങ്കെടുക്കുക. രാഷ്ട്രീയപാര്ട്ടികളുടെ നേതാക്കള്ക്കോ എം.പി, എം.എല്.എമാര്ക്കോ ക്ഷണമില്ല.
കേന്ദ്രമന്ത്രിയായശേഷമുള്ള അല്ഫോന്സ് കണ്ണന്താനത്തിന്റെ രണ്ടാമത് ചര്ച്ചയാണ് ഞായറാഴ്ചത്തേത്. കഴിഞ്ഞ നവംബര് 11ന് റബര് ബോര്ഡ് ആസ്ഥാനത്ത് യോഗം ചേരുകയും കര്ഷകരില്നിന്നും വ്യാപാര, വ്യവസായ പ്രതിനിധികളില്നിന്നും അഭിപ്രായം ആരായുകയും ചെയ്തിരുന്നു.
https://www.facebook.com/Malayalivartha