സംസ്ഥാനത്ത് സ്വര്‍ണ വില വീണ്ടും കുറഞ്ഞു. ഈ വര്‍ഷത്തെ ഏറ്റവും കുറഞ്ഞ വിലയാണ് ഇന്നത്തെ സ്വർണ്ണവില. ഒരാഴ്ചയായി തുടര്‍ച്ചയായി സ്വർണ്ണവില ഇടിയുകയാണ്. ഗ്രാമിന് 55 രൂപ കുറഞ്ഞ് 4270 രൂപയും പവന് 440 രൂപ കുറഞ്ഞ് 34,160 രൂപയും ആണ് ഇന്നത്തെ വില. ഇതോടെ മൂന്ന് ദിവസത്തിനുള്ളില്‍ 840 രൂപയാണ് പവന് കുറഞ്ഞത്.

ഒൻപത് മാസത്തെ താഴ്ന്ന നിരക്കാണ് ഇപ്പോള്‍ സ്വര്‍ണ്ണത്തിന്റേത്. അന്തരാഷ്ട്ര വില 1720 ഡോളര്‍ വരെ താഴ്ന്ന ശേഷം 1932 ഡോളറിലാണിപ്പോള്‍. രൂപ കൂടുതല്‍ ദുര്‍ബലമായി 73.90 ലേക്കെത്തിയത് സ്വര്‍ണ വില കൂടുതല്‍ കുറയാതിരിക്കാനുള്ള കാരണമായി.

ഫെബ്രുവരി ഒന്നിന് രേഖപ്പെടുത്തിയ 36,800 രൂപയായിരുന്നു ഈ മാസത്തെ ഏറ്റവും കൂടിയ വില. പിന്നീട് ചില ദിവസങ്ങളില്‍ വില അങ്ങനെ തന്നെ തുടർന്ന ശേഷം തുടര്‍ച്ചയായി താഴേയ്ക്ക് പോയ സ്വർണ്ണത്തിന് ഈ മാസം മാത്രം 2640 രൂപയാണ് ഇടിഞ്ഞത്. സ്വര്‍ണ വില ഇനിയും കുറയുമെന്ന പ്രതീക്ഷയില്‍ ആഭരണ ഭ്രമം ഉള്ളവർ കാത്തിരിക്കുകയാണ്.