കേരളത്തിൽ ഓണാഘോഷങ്ങളെ ബാധിക്കാൻ സാധ്യതയുള്ള കടുത്ത കാലാവസ്ഥാ മുന്നറിയിപ്പുമായി കേന്ദ്ര കാലാവസ്ഥാ വകുപ്പ്. വടക്ക് പടിഞ്ഞാറൻ ബംഗാൾ ഉൾക്കടലിൽ പുതിയൊരു ന്യൂനമർദ്ദം കൂടി രൂപപ്പെട്ടതോടെ സംസ്ഥാനത്ത് തിരുവോണം വരെ ഇടിമിന്നലോടു കൂടിയ ശക്തമായ മഴയ്ക്ക് സാധ്യതയുണ്ടെന്നാണ് പുതിയ റിപ്പോർട്ട്.

മണിക്കൂറിൽ 40 കിലോമീറ്റർ വരെ വേഗതയുള്ള വൻ കാറ്റിനും സാധ്യതയുണ്ട്. ഇന്ന് മാത്രം പത്തനംതിട്ട, ഇടുക്കി, കോഴിക്കോട്, വയനാട്, കണ്ണൂർ, കാസറഗോഡ് ഉൾപ്പെടെ ആറ് ജില്ലകളിൽ മഞ്ഞ അലർട്ട് പ്രഖ്യാപിച്ചിരിക്കുകയാണ്. ഇതിനുപുറമേ കേരള തീരത്ത് കള്ളക്കടൽ പ്രതിഭാസം മൂലമുള്ള കടലാക്രമണ ഭീഷണിയും നിലനിൽക്കുന്നുണ്ട്.