ബിഎസ്എന്‍എല്‍ 599 രൂപയ്ക്ക് അണ്‍ലിമിറ്റഡ് ബ്രോഡ്ബാന്‍ഡ് പ്ലാനുമായി രംഗത്തെത്തി. രണ്ട് എംബിപിഎസ് വേഗത്തില്‍ എത്ര ജിബി വേണമെങ്കിലും ഈ പ്ലാനില്‍ ഉപയോഗിക്കാം. 599 രൂപയുടെ പുതിയ പ്ലാനിലേക്കു നിലവിലുള്ള ബ്രോഡ്ബാന്‍ഡ് ഉപയോക്താക്കള്‍ക്കും മാറാം. ലാന്‍ഡ് ഫോണില്‍ ലഭ്യമാകുന്ന രാത്രികാല സൗജന്യ കോള്‍ സൗകര്യവും ഞായറാഴ്ചകളിലെ 24 മണിക്കൂര്‍ സൗജന്യവും ഈ പ്ലാനിലും ലഭിക്കും.

കൂടാതെ 675 രൂപയുടെ പ്ലാനില്‍ നാല് എംബിപിഎസ് വേഗത്തില്‍ അഞ്ചു ജിബി ലഭിച്ചിരുന്നതു 10 ജിബി വരെയും 999 രൂപയുടെ പ്ലാനില്‍ നാല് എംബിപിഎസ് വേഗത്തില്‍ 20 ജിബി ലഭിച്ചിരുന്നതു 30 ജിബി വരെയുമാക്കി. നിലവില്‍ 1,199 രൂപയുടെ കോംബോ പ്ലാനിലായിരുന്നു ഈ സൗകര്യം ലഭിച്ചുകൊണ്ടിരുന്നത്. ഇത് ഉള്‍പ്പെടെ വിവിധ ബ്രോഡ്ബാന്‍ഡ് പ്ലാനുകളുടെ നിരക്കില്‍ ബിഎസ്എന്‍എല്‍ കുറവു വരുത്തി.

ഗ്രാമീണ മേഖലയില്‍ 220 രൂപ മാസവാടകയുള്ളവര്‍ക്ക് 29 രൂപയും 180 രൂപ മാസവാടകയുള്ളവര്‍ക്ക് 69 രൂപയും അധികം നല്‍കിയാല്‍ ഇതേ പ്ലാന്‍ ഉപയോഗിക്കാം. ഒരു വര്‍ഷത്തിനു ശേഷം 449 രൂപയുടെ പ്ലാനിലേക്ക് ഇതു മാറും. ഗ്രാമീണ മേഖലകളിലെ ഉപയോക്താക്കള്‍ക്കു മാത്രമുള്ള 650 രൂപയുടെ പ്ലാനില്‍ നിലവിലെ അഞ്ചു ജിബിക്കു പകരം രണ്ട് എംബിപിഎസ് വേഗത്തില്‍ 15 ജിബി ലഭിക്കും.

നഗരപ്രദേശങ്ങളില്‍ ബ്രോഡ്ബാന്‍ഡ് ഇല്ലാത്ത ബിഎസ്എന്‍എല്‍ ഉപയോക്താക്കള്‍ക്കു നിലവിലെ 240 രൂപയുടെ മാസബില്ലിനൊപ്പം ഒന്‍പതു രൂപ അധികം നല്‍കിയാല്‍ ഒരു വര്‍ഷത്തേക്ക് രണ്ട് എംബിപിഎസ് വേഗത്തില്‍ അഞ്ചു ജിബി വരെ ഉപയോഗിക്കാം. കോംബോ 249 എന്ന ഈ പ്ലാനില്‍ അഞ്ചു ജിബി ഉപയോഗത്തിനു ശേഷം വേഗം ഒരു എംബിപിഎസ് ആയി കുറയും.