സര്‍വകലാശാലയോട് അഫിലിയേറ്റ് ചെയ്തിട്ടുള്ള സര്‍വകലാശാലയുടെ നേരിട്ടുള്ള നിയന്ത്രണത്തിലുള്ള കോണ്‍സ്റ്റിറ്റിയുവന്റ് കോളജുകളിലെയും സര്‍ക്കാര്‍/എയ്ഡഡ്/സ്വാശ്രയ ആര്‍ട്‌സ് ആന്റ് സയന്‍സ് കോളജുകളിലെയും ഏകജാലകം വഴിയുള്ള ഒന്നാം വര്‍ഷ ഡിഗ്രി പ്രോഗ്രാമുകളിലേക്കുള്ള ഓണ്‍ലൈന്‍ രജിസ്‌ട്രേഷന്‍ ഈമാസം 28ന് ആരംഭിക്കും.
സര്‍വകലാശാല നേരിട്ട് ഏകജാലക സംവിധാനത്തിലൂടെ മെരിറ്റ് സീറ്റുകളിലെയും എസ്.സി/എസ്.റ്റി/എസ്.ഇ.ബി.സി/ഇ.ബി.എഫ്.സി സംവരണ സീറ്റുകളിലേക്കുമുള്ള അലോട്ട്‌മെന്റ് നടത്തും.
മാനേജ്‌മെന്റ്, കമ്യൂണിറ്റി, സ്‌പോര്‍ട്‌സ്, കള്‍ച്ചറല്‍ ക്വാട്ടാ, വികലാംഗ വിഭാഗത്തിന് സംവരണം ചെയ്ത സീറ്റുകള്‍ എന്നിവയിലേക്ക് അപേക്ഷിക്കുന്നവര്‍ പ്രവേശനം ആഗ്രഹിക്കുന്ന കോളജുകളില്‍ തന്നെ നേരിട്ട് അപേക്ഷ സമര്‍പ്പിക്കേണ്ടതാണ്. ലക്ഷദ്വീപില്‍ നിന്നുള്ള അപേക്ഷകര്‍ക്കായി ഓരോ കോളജുകളിലും സീറ്റുകള്‍ സംവരണം ചെയ്തിട്ടുണ്ട്. ലക്ഷദ്വീപ് നിവാസികളായ അപേക്ഷകര്‍ പ്രവേശനം ആഗ്രഹിക്കുന്ന കോളജുകളില്‍ തന്നെ നേരിട്ട് അപേക്ഷ സമര്‍പ്പിക്കണം.
ജൂണ്‍ മൂന്നു വരെ രജിസ്‌ട്രേഷനുള്ള സമയം ഉണ്ടായിരിക്കും. ഓരോ കോളജുകളിലെയും അക്കാദമിക് പ്രോഗ്രാം, സീറ്റുകളുടെ എണ്ണം ഇവ സര്‍വകലാശാല വെബ് സൈറ്റില്‍ കൊടുത്തിട്ടുള്ള പ്രോസ്‌പെക്ടസില്‍ ലഭ്യമാണ്. കൂടാതെ പ്രോസ്‌പെക്ടസിന്റെ സംക്ഷിപ്ത രൂപം മലയാളത്തിലും നല്‍കിയിട്ടുണ്ട്. രജിസ്‌ട്രേഷനുവേണ്ടി വെബ്‌സൈറ്റില്‍ പ്രസിദ്ധീകരിച്ചിരിക്കുന്ന നിര്‍ദേശങ്ങള്‍ക്കനുസൃതമായി നിര്‍ദിഷ്ട എസ്.ബി.ടി ശാഖകള്‍ വഴി മാത്രം അപേക്ഷാ ഫീസ് ഒടുക്കണം. അപേക്ഷാ ഫീസ് ഒടുക്കിക്കഴിഞ്ഞ് ഏതാനും മണിക്കൂറുകള്‍ക്ക് ശേഷം മാത്രമേ രജിസ്‌ട്രേഷനുള്ള തുടര്‍നടപടികള്‍ സാധ്യമാകൂ.
ഓണ്‍ലൈന്‍ രജിസ്‌ട്രേഷനുവേണ്ടി വിപുലമായ സംവിധാനങ്ങള്‍ സര്‍വകലാശാല ഇന്‍ഫര്‍മേഷന്‍ സെന്ററുകളിലും ലൈഫ് ലോങ് ലേണിങ് ആന്‍ഡ് എക്സ്റ്റന്‍ഷന്റെ കോട്ടയം, പത്തനംതിട്ട, കാഞ്ഞിരപ്പള്ളി സെന്ററുകളിലും ഒരുക്കും. ഇതുകൂടാതെ അക്ഷയ സെന്ററുകള്‍ വഴിയും ഓണ്‍ലൈന്‍ രജിസ്‌ട്രേഷന്‍ ഒരുക്കിയിട്ടുണ്ട്.
രജിസ്‌ട്രേഷന്‍ ഫീസ് എസ്.സി./എസ്.ടി. വിഭാഗത്തിന് 80 രൂപയും മറ്റുള്ളവര്‍ക്ക് 180 രൂപയുമാണ്. ഓണ്‍ലൈന്‍ രജിസ്‌ട്രേഷനായി www.cap.mgu.ac.in, www.mgu.ac.in എന്നീ വെബ് സൈറ്റുകള്‍ സന്ദര്‍ശിക്കുക. ഹെല്‍പ് ലൈന്‍ നമ്പര്‍ 04816555563, 6555564, 2732282, 2731020 (എക്സ്റ്റന്‍ഷന്‍: 1379)