സംസ്ഥാനത്തെ 10ാം ക്ലാസ് വിദ്യാര്‍ഥികളുടെ പഠന നിലവാരം അളക്കാന്‍വേണ്ടി കേരളത്തിലുടനീളം നാഷനല്‍ അച്ചീവ്മന്റെ് സര്‍വേയുടെ (നാസ്) ഭാഗമായി തിങ്കളാഴ്ച പ്രത്യേക പരീക്ഷ നടക്കും. തെരഞ്ഞെടുത്ത സ്‌കൂളുകള്‍ക്ക് രാവിലെ 10 മുതല്‍ 11.30 വരെയാണ് പരീക്ഷ. ഭാഷ, ഗണിതം, സയന്‍സ്, സാമൂഹ്യ ശാസ്ത്രം എന്നീ വിഷയങ്ങളിലാണ് പരീക്ഷ. 
ജനുവരി 27ന് സ്‌കൂളുകളില്‍ ഇതിന്റെ ഭാഗമായി മോഡല്‍ പരീക്ഷകള്‍ നടത്തിയിരുന്നു. ഓരോ ജില്ലയില്‍നിന്നും 80ഓളം സ്‌കൂളുകളെയാണ് തെരഞ്ഞെടുത്തിരിക്കുന്നത്. കോഴിക്കോട് ജില്ലയില്‍ 47 ഇംഗ്ലീഷ് മീഡിയം സ്‌കൂളുകളും 33 മലയാളം മീഡിയം സ്‌കൂളുകളുമാണ് വിദ്യാര്‍ഥികളെ പരീക്ഷക്കിരുത്തുന്നത്. ഇന്ത്യയിലെ മുഴുവന്‍ സംസ്ഥാനങ്ങളിലും വിദ്യാര്‍ഥികളുടെ പഠനനിലവാരം വിലയിരുത്താനുള്ള എന്‍.സി.ഇ.ആര്‍.ടിയുടെ നടപടികളുടെ ഭാഗമായാണ് പരീക്ഷ. തെരഞ്ഞെടുത്ത മുഴുവന്‍ വിദ്യാലയങ്ങളിലും ഇതിനാവശ്യമായ ചോദ്യപേപ്പറുകള്‍ എത്തിച്ചിട്ടുണ്ട്.
ഓരോ ചോദ്യങ്ങള്‍ക്കും നാലുവീതം ഉത്തരങ്ങള്‍ നല്‍കി അവയില്‍നിന്ന് ശരിയായത് മാത്രം തെരഞ്ഞെടുത്ത് എഴുതുന്ന ഒബ്ജക്ടിവ് രീതിയിലാവും പരീക്ഷ നടക്കുക. ഇതാദ്യമായാണ് ഒബ്ജക്റ്റിവ് രീതിയില്‍ മാത്രമുള്ള ഒരു പരീക്ഷയെ വിദ്യാര്‍ഥികള്‍ നേരിടുന്നത്.