എയിംസില്‍ എംബിബിഎസ് പ്രവേശന പരീക്ഷക്ക് കേരളത്തിലെ കേന്ദ്രങ്ങളില്‍ സീറ്റ് ഫുള്‍ ആയി
എയിംസ് (ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസ്) എം.ബി.ബി.എസ് പ്രവേശന പരീക്ഷക്ക് അപേക്ഷ ക്ഷണിച്ച് രണ്ടാം ദിവസം തന്നെ കേരളത്തിലെ കേന്ദ്രങ്ങളില്‍ സീറ്റ് തീര്‍ന്നു. തിങ്കളാഴ്ചയാണ് പരീക്ഷക്ക് ഓണ്‍ലൈന്‍ അപേക്ഷ സമര്‍പ്പിക്കാന്‍ തുടങ്ങിയത്. എന്നാല്‍, കേരളത്തിലെ കേന്ദ്രങ്ങളില്‍ സീറ്റില്ലെന്ന മറുപടിയാണ് ചൊവ്വാഴ്ച ഉച്ചമുതല്‍ തന്നെ ലഭിക്കുന്നതെന്ന് വിദ്യാര്‍ഥികളും രക്ഷിതാക്കളും പറയുന്നു. ചൊവ്വാഴ്ചക്കുശേഷം അപേക്ഷിക്കുന്നവര്‍ക്ക് മറ്റ് സംസ്ഥാനങ്ങളിലാണ് പരീക്ഷാകേന്ദ്രം ലഭിക്കുന്നത്.
മേയ് 26, 27 തീയതികളില്‍ നടക്കുന്ന പരീക്ഷക്ക് ഓണ്‍ലൈന്‍ അപേക്ഷ സമര്‍പ്പിക്കാനുള്ള അവസാന തീയതി മാര്‍ച്ച് അഞ്ചാണ്. എന്നാല്‍, അപേക്ഷ സമര്‍പ്പിച്ചു തുടങ്ങിയ രണ്ടാംദിവസം തന്നെ കേരളത്തിലെ കേന്ദ്രങ്ങളില്‍ സീറ്റ് തീര്‍ന്നത് വിദ്യാര്‍ഥികളെ വലച്ചിരിക്കുകയാണ്. അപേക്ഷയില്‍ നല്‍കുന്ന ഫോട്ടോയില്‍ ചെവി കാണണമെന്നാണ് ചട്ടം. അതിനാല്‍ ശിരോവസ്ത്രമണിഞ്ഞ് ഫോട്ടോയെടുത്ത വിദ്യാര്‍ഥിനികള്‍ വീണ്ടും ഫോട്ടോ എടുക്കേണ്ടതായും വന്നു.
ഇവരില്‍ പലരും പുതിയ ഫോട്ടോയുമായി അപേക്ഷിക്കാനെത്തിയപ്പോള്‍ ലഭിച്ചത് തമിഴ്‌നാട്, കര്‍ണാടക തുടങ്ങിയ സംസ്ഥാനങ്ങളിലെ കേന്ദ്രങ്ങളാണ്. തമിഴ്‌നാട്ടിലെ സെന്ററുകളിലേക്കുള്ള സീറ്റ് അലോട്ട്മന്റെും രണ്ടുദിവസത്തിനുള്ളില്‍ പൂര്‍ത്തിയാവുമെന്നാണ് അറിയുന്നത്. പരീക്ഷക്ക് ദൂരസ്ഥലങ്ങളിലേക്ക് വിദ്യാര്‍ഥികളോടൊപ്പം രക്ഷിതാക്കളും പോകേണ്ടി വരും. ഇതുമൂലം പരീക്ഷ എഴുതുന്നില്ലെന്ന് തീരുമാനിക്കുന്ന നിര്‍ധന വിദ്യാര്‍ഥികളും കുറവല്ല.
കൂടുതല്‍ വിദ്യാര്‍ഥികള്‍ പങ്കെടുക്കുന്ന എയിംസ് പോലുള്ള പരീക്ഷകള്‍ക്ക് കേരളമടക്കം സംസ്ഥാനങ്ങള്‍ക്ക് കൂടുതല്‍ പരീക്ഷാകേന്ദ്രങ്ങള്‍ അനുവദിക്കണമെന്നാണ് രക്ഷിതാക്കളുടെയും വിദ്യാര്‍ഥികളുടെയും ആവശ്യം. കേരളത്തില്‍ കോഴിക്കോട്, മലപ്പുറം, പാലക്കാട്, തിരുവനന്തപുരം, തൃശൂര്‍, കോട്ടയം, കൊല്ലം, കാസര്‍കോട്, കണ്ണൂര്‍, ഇടുക്കി, എറണാകുളം, ആലപ്പുഴ ജില്ലകളിലാണ് പരീക്ഷാകേന്ദ്രങ്ങള്‍
https://www.facebook.com/Malayalivartha
