യൂണിയന്‍ പബ്ലിക് സര്‍വിസ് കമീഷന്‍ നടത്തുന്ന സിവില്‍ സര്‍വിസ് പരീക്ഷ 2018ന് (പ്രിലിമിനറി) മാര്‍ച്ച് ആറുവരെ അപേക്ഷിക്കാം. സിവില്‍ സര്‍വിസ്, ഇന്ത്യന്‍ ഫോറസ്റ്റ് സര്‍വിസസ് എന്നിവയിലേക്കായിരിക്കും നിയമനം. ഏതെങ്കിലും അംഗീകൃത സര്‍വകലാശാലയില്‍നിന്നുള്ള ബിരുദമാണ് അടിസ്ഥാന യോഗ്യത. 782 തസ്തികയിലേക്കായി നടക്കുന്ന പരീക്ഷ 2018 ജൂണ്‍ മൂന്നിന് നടക്കും. 2018 ആഗസ്റ്റ് ഒന്നിന് 21 വയസ്സ് പൂര്‍ത്തിയായവര്‍ക്കും 32 വയസ്സ് കവിയാത്തവര്‍ക്കും അപേക്ഷിക്കാം. സംവരണ വിഭാഗങ്ങള്‍ക്ക് സര്‍ക്കാര്‍ ചട്ടപ്രകാരമുള്ള വയസ്സിളവ് ലഭിക്കും. അപേക്ഷകള്‍ ഓണ്‍ലൈനായി  www.upsconline.nic.in എന്ന വെബ്‌സൈറ്റിലൂടെ സമര്‍പ്പിക്കാം. 

മുന്‍ വര്‍ഷങ്ങളില്‍ പരീക്ഷയെഴുതിയവര്‍ക്ക് പഴയ രജിസ്‌ട്രേഷന്‍ ഐഡിയും പാസ്‌വേഡും ഉപയോഗിച്ച് അപേക്ഷ സമര്‍പ്പിക്കാം. ഒരാള്‍ക്ക് ആറുതവണ മാത്രമേ സിവില്‍ സര്‍വിസ് പരീക്ഷ എഴുതാന്‍ സാധിക്കൂ. ഒ.ബി.സി വിഭാഗങ്ങള്‍ക്ക് ഒമ്പതു തവണയും പരീക്ഷ എഴുതാം. എസ്.സി/എസ്.ടി വിഭാഗങ്ങള്‍ക്ക് ഈ നിബന്ധന ബാധകമല്ല. പ്രിലിമിനറി പരീക്ഷ പാസാവുന്നവര്‍ക്ക് മാത്രമാണ് മെയിന്‍ പരീക്ഷ എഴുതാനാവുക. പ്രിലിമിനറി, മെയിന്‍, ഇന്റവ്യൂ എന്നിവയുടെ അടിസ്ഥാനത്തിലാണ് പരീക്ഷയില്‍ വിജയിക്കാനാവുക.